Урушга тайёр Жўланий, таксидаги Пизишкиён – ҳафта дайжести

Ассалому алайкум, азизлар. Бугун 20 июл, якшанба. Ўтган ҳафта дунёнинг яна бир давлатида уруш авж олиб, Исроил энди Сурияга ҳужум қилди. АҚШ президенти Трамп Россияга муҳлат берди. Океан ортида футбол клублари ўртасида жаҳон чемпионати якунланди, Эрон президенти Табризга таксида борди. Қуйида ҳафта давомида жаҳон саҳнасида содир бўлган баъзи муҳим воқеаларни биргаликда эслаймиз.

{Yii::t(}

Ўтказиб юбориш 6s

Исроилнинг Сурияга ҳужуми

Исроил Яқин Шарқдаги яна бир давлат – Сурияга ҳужум қилди. Россия қўлловидаги диктатор Башар Асад ағдарилганидан кейин Исроил тез-тез бу давлатга ракета учираётганди, лекин бу гал ЦАҲАЛ аввалги каби Асад армиясидан қолган ташландиқ бинони эмас, Сурияни жанг билан олган Жўланий ҳукуматига тегишли мудофаа вазирлиги биносини нишонга олди. Бу – жиддий зарба.

Нетаняҳунинг айтишича, Исроил Сурияга «у ердаги друзларни ҳимоя қилиш учун» ҳужум қилибди. Исроил Дамашқдан жанубий ҳудудларни «демилитаризация қилмоқчи». «Друзлар урушаётганда биз жим қараб турмаймиз», деди Исроил бош вазири.

Маълумот учун, Аҳмад аш-Шаръа бошчилик кучлар ҳукуматга келганидан кейин Сурияда друзларга нисбатан зўравонлик кучайди. Сурия янги лидери бу муаммо ҳал қилинишини айтди. Биз Исроилнинг Суриядаги иддаолари бўйича алоҳида материал ҳам эълон қилганмиз. Уни ўқишингизни тавсия қиламан.

Ҳафта баёноти

Ҳафтанинг энг муҳим баёноти Сурия янги президенти Аҳмад аш-Шаръа томонидан берилди. Жанговар тахаллуси Жўланий бўлган қўмондон-президент Исроилнинг навбатдаги ҳужумидан кейин Тел-Авив манзилига кескин чиқиш қилди. Хусусан, Сурия урушдан қўрқмаслигини айтди.

«Миллатимиз ажралмас қисми бўлмиш друзларга мурожаат қиламан: Сурия ҳеч қачон ўз фарзандлари ўртасида бўлинишга йўл қўймайди. Сизнинг ҳуқуқ ва эркинлигингизни ҳимоя қилиш – бизнинг вазифамиз. Сизни ташқи кучлар билан иттифоқ бўлишга ундайдиган ишларни қилмаймиз.

Исроил собиқ тузум қулаганидан буён орага нифоқ солишга уриниб келмоқда. Улар бугун муқаддас юртимизни яна жанг майдонига айлантиришмоқчи. Кучли бўлиш ғалаба дегани эмас. Сиз уруш бошлашингиз мумкин, лекин унинг оқибатини назорат қилолмаймиз. Биз урушдан қўрқмаймиз, бу бизнинг ерларимиз ахир. Умримиз давомида кўп синовларга дуч келиб доим сурияликлар манфаатини вайронгарчиликлардан устун қўйдик. Ҳозир биз қиладиган энг тўғри қарор – ватанимиз бирлигини таъминлаш», деди Аҳмад аш-Шаръа.

Бу жиддий баёнот, азизлар. Бу бирор фуқароси қўлига қурол олиб ҳимоя қилмаган, доим Россияга орқа қилиб халқини эзган қўрқоқ Башар Асаднинг, фақат ракета отиш билан чекланадиган «Ҳизбуллоҳ» лидерининг ёки «кемаларни овлашни» ёқтирадиган Яман ҳусийчиларининг эмас, Суриядек катта давлатни жанг билан олган, уруш нималигини, қўпол қилиб айтганда, одам ўлдиришни биладиган Абу Муҳаммад Ал Жўланийнинг баёноти. У Исроилга «Уруш очаверинг, биз урушдан қўрқмаймиз», деяпти.

Ишонинг, Аҳмад аш-Шаръа номига қайтган қўмондон Жўланий бугунги кунда дунёдаги энг уникал лидер. Унинг яхши-ёмонлиги ҳақида гапирмоқчи эмасман, лекин ҳеч кимга ўхшамаслиги аниқ. Айтмоқчи бўлганим, Исроил Сурияда Фаластинда ёки Ливанда қилган ишларини қила олмайди. Жўланий охирги баёнотида мазмунан шундай деди.

Трамп Россияга муҳлат берди

Ҳафта давомида АҚШ президенти Доналд Трамп НАТО бош котиби Марко Рютте билан учрашув вақтида Россия – Украина уруши бўйича баёнот берди. Трамп кутилганидек Украинага ҳарбий ёрдам пакети ҳақида эълон қилмади, шунчаки Киев 17 та «Patriot» ҳаво ҳужумидан мудофаа тизимлари олишини тасдиқлади. Баёнотнинг энг муҳим қисми – Трамп Путинга муҳлат бергани бўлди. «Агар 50 кун ичида Россия Украина билан сулҳ бўйича келишув имзоласа, Москвага қарши чеклов эълон қилинади», деди Трамп. Бу Россияга нечанчи марта муҳлат бериши эканини Трампнинг ўзи ҳам билмаса керак...

Трамп ва Путин Хитойда учрашиши мумкин

Хитой 3 сентябр куни Иккинчи жаҳон уруши якунланганига бағишланган тантанали парад ўтказмоқчи. Тўғри айтасиз, ўзи шулар қолувди парад ўтказмаган. Хуллас, Хитой раиси Си Жинпинг ана шу парадга Путин ва Трампни таклиф қилган эмиш. Бу ҳақда Times нашри ёзиб чиқди. Хабарда айтилишича, парадлар ишқибози Путин бу тадбирда қатнашишини тасдиқлаган. Трамп Хитойга бориши эса қийин масала.

Қизиғи, Хитойдаги парад айнан Трамп Путинга берган муҳлат тугашига тўғри келади. Times'га кўра, Хитой бу параддан «тинчлик учун фойдаланиб қолиш кераклигини» билдирган.

«Челси» ПСЖнинг «попугини пасайтириб қўйди»

Ҳафта бошида АҚШда футбол клублари ўртасида жаҳон чемпионати якунланди. Финалда кутилганидек Европа клублари етиб келди. Кўпчилик Чемпионлар Лигаси ғолиби, финал йўлида «Реал»ни тор-мор қилган ПСЖ қитъанинг учинчи мусобақаси – Конференциялар Лигаси ғолиби «Челси»ни осонлик билан енгади деб ўйлаганди, лекин бунақа бўлмади.

Италиялик Энцо Мареска бошқарувидаги «Челси» Трамп кўз ўнгида ўтган ўйинда 3:0 ҳисобида осон ғалабага эришди. Инглизлар сафида дунёнинг энг кучли футболчиларидан бўлмиш Кол Палмер иккита гол уриб, битта голга ассистентлик қилди. «Челси»нинг учинчи голини Жоау Педру урди. Эсингизда бўлса, ўтган мавсум «Брайтон»да порлаган бразилиялик ҳужумчи июл бошида «Челси»га қўшилиб, КЖЧда учта гол уришга улгурди.

Кол Палмер мусобақанинг энг яхши футболчиси деб топилди. Шу тариқа ПСЖ оғир мавсум якунида «совуқ душ қабул қилди» ва баҳонода «осмонлардан ерга тушди». «Челси» эса янги мавсум АПЛни ютиш учун асосий даъвогарлардан бири эканини кўрсатди. Ишонинг, янги мавсумда Англиядаги чемпионлик пойгасида «Арсенал» ва «Ливерпул»га осон бўлмайди...

Украинада ҳукумат янгиланди

Украина президенти Володимир Зеленский янги ҳукумат таркибини тасдиқлади. Эндиликда собиқ иқтисодиёт вазири Юлия Свириденко бош вазир лавозимига тасдиқланди. Олдинги бош вазир Денис Шмигал мудофаа вазири бўлди. Бу лавозимни эгаллаб келган Самарқандда туғилган Рустем Умеров Украина хавфсизлик кенгаши котиб бўлиб, асосан Россия билан музокараларга масъул қилинди.

Президент Зеленский янги ҳукуматнинг вазифаси Украина ҳарбий қудратини ошириш эканини айтди. Зеленскийга кўра, ҳозир Украина фронтдаги 40 фоиз қуролларни ўзи ишлаб чиқармоқда ва бу кўрсаткич 50 фоизга чиқиши керак. Матбуотда 39 ёшли Свириденко бош вазир бўлгани фаол муҳокама қилинмоқда. Чунки бу аёл президент девони раҳбари Ондрий Ермакнинг яқини экани айтилади. Янги бош вазири АҚШ билан нодир металлар бўйича келишувга эришилишида асосий ишни бажарган. Афтидан, Зеленский уни мана шу муҳим келишувдаги хизматлари учун мукофотлаган.

Эрон президенти таксида

Ҳафтанинг энг қизиқ воқеаларидан бири Эронда содир бўлди. Табризга ишчи ташриф билан борган Эрон президенти Масъуд Пизишкиён кортежидаги барча уч машина ўчиб қолди. Маҳаллий нашрларнинг ёзишича, Рашт трассасида машиналарга бензин қуйилган. Ноинсоф бензинфуруш ёқилғига сув қўшгани учун машина йўлда кетаётиб таққа тўхтаган. Камтарин Пизишкиён шошаётгани учун вертолёт ёки бошқа «авлиё машина» келишини кутиб ўтирмай, таксида йўлини давом эттирган.

Президентга сув қўшилган бензин сотган шохобча устидан суриштирув бошланган. Ноинсоф, бензинга сув ҳам қўшасанми. Мана, бизнинг «заправка»чиларга ўхшаб конденсат қўш, ҳеч бўлмаса, «80»ни «92» деб сот. Тўғриси, нефтга бой Эронда бензинга сув қўшиб сотишлари жуда ғалати ҳолат. Бир томондан президентга шунақа бензин сотишгани эронликлар учун яхши бўлган. Баҳонада бунақа муаммолар бартараф этилиши мумкин...

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.

#ҳафта дайжести