«Биз уларни топдик ва кимлигини аниқладик». Путин Скрипалларга суиқасдда гумонланаётганлар ҳақида гапирди

Россия президенти Владимир Путин маълум қилдики, Россия ҳукумати Британия ҳукумати томонидан Скрипаллар иши бўйича гумонланаётган Александр Петров ва Руслан Боширов ҳақида маълумотларга эга. Унинг айтишича, бу шахслар британлар айтганидек «Разведка бошқармаси ходимлари» эмас, балки оддий россиялик фуқаролардир.

«Биз албатта бу одамларни кузатдик ва уларни топиб, кимлигини аниқладик. Бу ерда ҳеч қандай жиноий иш йўқ, сизларни ишонтириб айтаман, улар оддий фуқаролар», деган Путин Владивостокда ўтказилаётган Шарқий иқтисодий форум вақтида.

Путин Петров ва Бошировга ОАВ орқали чиқиш қилиб, барчасини айтиб беришни таклиф қилган.

«Умид қиламанки, уларнинг ўзи қачондир пайдо бўлади ва ОАВ орқали ўзлари ҳақида бор ҳақиқатни айтиб беришади», деган у.

Ўтган ҳафтада, 5 сентябрь куни Буюк Британия ҳукумати Сергей ва Юлия Скрипалнинг заҳарланишида мамлакатга Александр Петров ва Руслан Боширов номлари билан келган «Разведка Бошқармаси ходимлари»ни айблаб чиққанди. 

АҚШ, Франция, Германия ва Канада Скрипаллар иши бўйича бу айбловни қўллаб-қувватлаган.