Барча йўловчилари эмланган круиз лайнерда коронавирус тарқалиши қайд қилинди

Барча йўловчилари ва экипажи аъзолари коронавирусга қарши эмланган круиз лайнер Celebrity Millennium’да коронавирус тарқалиши қайд қилинди. Бу ҳақда ABC News телеканали хабар берди. 

Celebrity Millennium бортида фақат эмланган одамлар бўлган йирик лайнер ҳисобланиб, унга эгалик қилувчи компанияда бундай ёндашув пандемияга қарамай лайнер ишини тиклашга имкон беради, деб ишонишган.

Бироқ Кариб денгизидаги Синт-Мартен оролида йўловчилар туширилганда улардан икки нафарида коронавирус аниқланган. Таъкидланишича, иккала йўловчи ҳам бир каютада яшаган. Энди улар вирусга манфий тест топширмагунларигача оролда қолишларига тўғри келади. Кема экипажи эса касалланганлар кимлар билан алоқада бўлганларини аниқлаш билан шуғулланмоқда.

Пандемия бошида бир нечта круиз лайнерда коронавирус тарқалиши қайд қилинганди. Бундай ҳодисалардан энг аянчлиси Diamond Princess лайнери билан юз берган. 2020 йил 5 февралда кема йўловчиларидан бири – 80 ёшли ҳонгконглик эркакда коронавирус аниқлангандан кейин лайнер Япониянинг Иокогама шаҳрида карантинга қўйилганди. Ўша вақтда кемада 50тадан зиёд давлатдан ҳаммаси бўлиб 3,7 мингга яқин одам бўлган. Улардан 700дан кўпроғида вирус борлиги тасдиқланган, 7 йўловчи касалликдан вафот этган.