1- ва 2-синф ўқувчилари учун она тили ва ўқишдан уйга вазифани баҳолаш бекор қилинади

Қайд этилишича, миллий ўқув дастурига кўра 1- ва 2-синф ўқувчилари учун уй вазифалари олиб ташланганлиги боис уйга вазифани баҳолаш бекор қилинади.

Уйга вазифаларнинг олиб ташланишига биринчи сабаб уларнинг амалда самарасиз топшириққа айлангани бўлса, иккинчидан дарслардан чарчаб борган қуйи синф ўқувчилари уйда кўпроқ дам олишлари лозим деб қаралмоқда. 

Самарасиз топшириқ деганда ўқувчи бажариб келган уйга вазифалар йўл-йўлакай текширилаётгани ёки деярли текширилмаётгани, ўқувчи хато ва ютуқларини етарли англаб олиши учун вақтнинг етишмаслиги назарда тутилган.

“Ўқувчилар “аъло” баҳо олиш учун яхши ўзлаштирувчи синфдошлари ёки уй вазифалар жойланувчи турли сайтлардан кўр-кўрона кўчириб келиш ҳолатлари кўпайган.

Уй вазифалар баҳоланмайди дегани, бу бола уйда умуман дарс қилмайди, дегани эмас. Фан дастурига кўникмаларни шакллантирувчи айрим лойиҳавий топшириқлар киритилган. Ота-онаси ва яқинларидан тегишли мавзуларда маълумот олиб келиш, дўстига табрик хати ёзиш кабилар шулар жумласидан”, дейилади маълумотда.

Билдирилишича, чораклик баҳоларни кундалик олинган баҳоларга қараб қўйиш амалиёти бекор қилинади.

2022-2023 -ўқув йилидан бошлаб кундалик йиғилган баҳолар чораклик баҳога таъсир қилмайди. Кундалик баҳо ривожлантирувчи аҳамиятга эга, чораклик баҳо эса эришилган маррани текшириш учун хизмат қилади. Бу икки баҳолашни ўзаро қориштириш сифатга таъсир қилади.

Йиллик баҳони чораклик баҳолар асосида қўйиш амалиёти бекор қилинади. Йил охирида ўқитувчи ўқувчилар учун қўйилган минимал талабга жавоб бера олишини текшириш учун имтиҳон ўтказиши лозим. Ҳар чоракдаги баҳо бу минимал талабни бажара олиши ёки олмаслигини яққол кўрсатиб бера олмайди.