Северодонецк учун шиддатли жанглар, шарқдаги ҳудудлардан эвакуация давом этмоқда. Уруш суратлари

Урушнинг 106-кунида ўзини ўзи мустақил деб эълон қилган «ДХР» суди уч нафар хорижликни (икки британиялик ва бир марокашлик) Украина томонида туриб ҳарбий ҳаракатларда иштирок этгани учун ўлимга ҳукм қилди. Украина мудофаа вазири Алексей Резников мамлакат қуролли кучлари Донбассдаги ҳарбий ҳаракатларда ҳар куни ўртача 100 нафар атрофида ҳарбийсидан айрилаётганини, яна 500 киши яраланаётганини маълум қилди. «ДХР» кучлари Славянск учун жанглар бошланганини эълон қилган.

Британиялик Эйден Аслин, марокашлик Саадун Иброҳим ва яна бир британиялик Шон Пиннер тан олинмаган «ДХР» ҳукумати томонидан «Украина қуролли кучлари сафида ёлланма жангчилар сифатида жанг қилгани» учун ўлимга маҳкум этилди. Аслида уларнинг учаласи ҳам бир неча йилдан буён Украинада яшаб келган ва шартнома асосида Украина армиясида хизмат қилган, Аслин эса Украина фуқаролигини ҳам олганди. Фото: Владимир Гердо / ТАСС

Урушнинг 107-куни. Сўнгги маълумотлар

Украина ҳарбий разведкаси раҳбари ўринбосари Вадим Скибицкий Британиянинг Guardian газетасига берган интервюсида Украина Донбассда олиб борилаётган артиллерия урушида енгилаётганини айтди: унинг сўзларига кўра, украинлардаги артиллерия қуроллари россияликларникидан 10-15 баробар камроқ, Украина иттифоқчилари ўзларида бор қуролларнинг фақат 10 фоизини беришган. Шунингдек Украинада советлар қуроллари учун снарядлар тугамоқда.
Украина бош штабининг 10 июн тонгидаги ахборотида Россия қўшини муҳим таянч пунти Бахмут томон илгарилаётгани айтилган: бош штаб Россия юриши Воздвиженка-Рота районида «қисман муваффақиятга эришаётгани»ни қайд этган - бу район Бахмутдан бир неча километр шарқда жойлашган.
Украина армиясининг «Жануб» оператив қўмондонлиги 9 июн кунги ахборотида украин авиацияси рақибнинг дарё кечувида тўпланган техникалари ва шахсий таркибига, Херсон областидаги бешта турли аҳоли пунктларида жойлашган дала омборхоналарига давомли зарбалар берганини маълум қилган.
Bloomberg агентлиги пайшанба куни аноним манбасига асосланган ҳолда Европа комиссияси кейинги ҳафта охирида Украинага Европа Иттифоқига аъзо бўлишга номзод мамлакат мақомини бериш бўйича расмий тавсия бериши мумкин, аммо бундай қарор Евроиттифоқ саммитида консенсусга эришиш орқали қабул қилинади, айрим давлатлар эса - камида, Нидерландия ва Дания - Украина ҳали тайёр эмас деб ҳисобламоқда.

Қуйида 9 июн куни Украинанинг турли ҳудудларида олинган суратлар.

Николаев