Францияда янги бош вазир тайинланди

73 ёшли сиёсатчини тайинлаш ҳақидаги қарор президент Эммануэл Макрон томонидан имзоланди.

Фото: AFP

Франциянинг янги бош вазири этиб Франсуа Байру тайинланди, тегишли қарорни 13 декабр куни президент Эммануэл Макрон имзолади.

Макрон маслаҳатлашувлардан сўнг тайинлов ҳақида маълум қилди. Байру — Макрон тарафдори ва марказчи «Демократик ҳаракат» партияси етакчиси. Унга янги ҳукуматни шакллантириш вазифаси юклатилди.

Олдинги бош вазир Мишел Барние атиги 3 ой ишлаб, 5 декабр куни истеъфога чиққан эди. Бундан бир кун олдин Франция парламенти бош вазирнинг келаси йил бюджетини парламент билан келишилмаган ҳолда тасдиқлаш тўғрисидаги қарори туфайли Барние ҳукуматига ишончсизлик вотумини маъқуллади.

CNN нашрининг таъкидлашича, энди Байру бюджетни бўлинган парламент орқали ўтказиши керак, бунда Макрон чап ва ўнг блокларнинг очиқ қаршиликларига дуч келмоқда.

#Франция #бош вазир #Франсуа Байру