Мисрда ичида сайёҳлар бўлган батискаф чўкиб кетди. Олти киши ҳалок бўлди

Батискаф бортида экипаж аъзоларидан ташқари 45 нафар россиялик сайёҳ бўлган.

Фото: Getty images

Мисрнинг Ҳургада шаҳри соҳилларида сайёҳлик батискафи чўкиб кетди. Bild’нинг ёзишича, ҳодиса оқибатида камида олти киши ҳалок бўлган.

Россия бош консуллиги маълумотларига кўра, ҳалок бўлганларнинг тўрт нафари РФ фуқароларидир. Шунингдек, яна бир неча кишининг тақдирига аниқлик киритилмоқда.

Россиялик дипломатлар маълумотларига кўра, «Синбад» меҳмонхонасига тегишли батискаф 27 март тонгида маржон рифларини томоша қилиш бўйича сувости экскурсиясига йўл олган. Экипаж аъзоларидан ташқари, унинг бортида «Библио Глобус» компаниясининг 45 нафар россиялик туристи, жумладан, болалар ҳам бўлган.

Батискаф қирғоқдан бир километр узоқликда ҳалокатга учраган бўлиб, бу нима сабабдан юз берганига аниқлик киритилмаган.

Bild’нинг ёзишича, сув остига шўнғишга мўлжалланган батискафдан бир неча йилдан бери фойдаланиб келинади ва у 22 метр чуқурликкача туша олади.

Дастлабки маълумотларга кўра, батискаф бортида бўлганларнинг аксарияти қутқарилган ҳамда Ҳургададаги меҳмонхоналарига, айримлари шифохонага етказилган. Дипломатларнинг айтишича, уларнинг саломатлигига ҳеч нарса хавф солмаяпти.

Мисрнинг Sada El Balad ва Al-Masry Al-Youm нашрларининг ёзишича, авария оқибатида олти киши ҳалок бўлган, яна 15-16 киши жароҳат олган. Россиялик дипломатлар мазкур маълумотга изоҳ бермаган.

#Миср #батискаф