Суд футболчи Дани Алвеснинг 4,5 йиллик қамоқ ҳукмини бекор қилди

Машҳур футболчи зўрлаш иши бўйича оқланди, аммо ҳукм устидан ҳали апелляция берилиши мумкин.

Фото: Reuters

Каталония Олий суди зўрлаш иши бўйича судланган бразилиялик футболчи Дани Алвеснинг апелляциясини тўлиқ қаноатлантирди ва айблов ҳукмини бекор қилди. Шунингдек, Алвеснинг эркин ҳаракатланиши учун қўйилган барча чекловлар олиб ташланди, деб хабар берди Reuters.

Суд ишда «айбсизлик презумпцияси талаб қиладиган меъёрлардан ошиб кетадиган» далиллар етарли эмаслигини аниқлади. Суднинг таъкидлашича, жабрланувчи деб тахмин қилинган аёлнинг кўрсатмалари видеоёзувлар орқали тасдиқланиши мумкин бўлган фактларга келганда ишончли эмас. Суднинг фикрича, бу жабрланувчи аёлнинг кўрсатмалари ҳақиқат эмаслигини «аниқ кўрсатди».

Қарор устидан ҳали ҳам Испания Олий судига шикоят қилиниши мумкин.

2024 йил февралида суд Алвесни 2022 йилда Барселона шаҳри тунги клуби ҳожатхонасида аёлни зўрлаганликда айблаб, тўрт ярим йилга озодликдан маҳрум қилди. Алвес 2023 йил январида ҳибсга олинганидан бери қамоқда эди. 2024 йил мартида, ҳукмдан бир ой ўтиб, суд уни бир миллион евро гаров эвазига озод қилди.

41 ёшли Алвес ўз фаолиятини Испаниянинг «Севилья» клубида бошлаган ва кейин «Барселона»да саккиз мавсумни ўтказган, у билан бир неча бор Чемпионлар лигасида ғолиб чиққан ва бир неча бор Испания чемпиони бўлган. 2016 йилдан бери Алвес «Ювентус», «Пари Сен-Жермен» ва Бразилиянинг «Сан-Паулу» клубларида ўйнаган. Кейин у эркин агент сифатида «Барселона»га қайтди ва 2022 йилда клубни тарк этиб, мексикалик UNAM Pumas билан шартнома имзолади.

#суд #Дани Алвес #Футбол