АҚШ иқтисодиёти 2022 йилдан бери биринчи марта қисқарди – ОАВ

АҚШ иқтисодиёти 2022 йилдан бери биринчи марта қисқарди, бу президент Доналд Трамп савдо сиёсати таъсирининг биринчи расмий белгисидир, деб хабар берди Bloomberg.

Ҳукумат ҳисоботида айтилишича, инфляцияга мослаштирилган ялпи ички маҳсулот биринчи чоракда йиллик ҳисобда 0,3 фоизга камайди, бу сўнгги икки йилдаги ўртача 3 фоизлик ўсишдан анча паст. Таққослаш учун, 2024 йилнинг тўртинчи чорагида ЯИМ 2,4 фоизга ошган эди.

Иқтисодий таҳлил бюроси ҳисоботида айтилишича, соф экспорт ялпи ички маҳсулотнинг қарийб 5 фоизини тортиб олди. ЯИМ 2/3 қисмини ташкил этувчи истеъмол харажатлари атиги 1,8 фоизга ўсди, бу 2023 йил ўрталаридан бери энг заиф кўрсаткичдир. Давлат харажатлари 5,1 фоизга қисқарди (тўртинчи чоракда 2,5 фоизга ўсган эди), бу уч йил ичидаги энг катта пасайишдир.

Шу билан бирга, асбоб-ускуналар - дастгоҳлар, машиналар, саноат иншоотлари ва бошқа ишлаб чиқариш воситаларини сотиб олиш бўйича бизнес харажатлари жуда кескин ўсди: ўтган йилнинг шу даврига нисбатан 22,5 фоизга (йиллик ҳисобда). Бу ўсиш шуни кўрсатадики, умумий иқтисодий пасайишга қарамай, компаниялар ўз қувватларини модернизация қилиш ёки кенгайтиришга фаол сармоя киритмоқда.