Нидерландия Украинага F-16'нинг сўнгги партиясини етказиб беришни якунлаяпти

Нидерландия шу ҳафта Украинага ваъда қилинган 24 та F-16 қирувчи самолётининг охиргисини етказиб беради, деди мамлакат мудофаа вазири.

Фото: KENZO TRIBOUILLARD/AFP/Getty Images

Нидерландия F-16 қирувчиларини Украинага топширишни якунламоқда, самолётларнинг охиргиси 26 май куни етказиб берилади. Бу ҳақда Нидерландия мудофаа вазири Рубен Брекелманс 25 май, якшанба куни WNL op Zondag телеканалида маълум қилди.

«Бу ваъда қилинган 24 та қирувчининг барчаси тез орада Украинада бўлишини англатади», — деди вазир. Самолётларни топширишдан ташқари, Нидерландия учувчилар ва техникларни тайёрламоқда ва ўз ҳарбий доктриналарини Украина билан бўлишмоқда, дея таъкидлади Брекелманс ҳамда яна иттифоқчиларни Украинага максимал даражада ёрдам беришни давом эттиришга чақирди.

Нидерландия ўзининг F-16 қирувчиларини Украинага топширишга рози бўлган биринчи давлатлардан бири бўлди, бунга қисман мамлакат армияси янги F-35 моделига ўтаётгани сабабдир. Биринчи самолёт Киевга ўтган йилнинг июл ойида етказилган эди.

Нидерландиядан ташқари Дания, Белгия ва Норвегия ҳам Украинага F-16 қирувчи самолётларини етказиб беришга ваъда берган. 2025 йил мартида Белгия Украинага биринчи реактив самолётларни етказиб беришни 2026 йилгача қолдиргани маълум бўлди, бунга эҳтиёт қисмлар ва учувчилар етишмаслиги сабаб бўлди.

Бундан ташқари, Франция Украинани Ғарб типидаги қирувчи самолётлар билан таъминлайди, аммо Америка F-16'си эмас, балки маҳаллий ишлаб чиқарилган самолётлар — Mirage-2000'ни беради.

#Нидерландия #F-16 #Рубен Брекелманс