Ветнамда маст эркак 200 йиллик император тахтини синдириб қўйди

Артефакт мамлакатни бошқарган сўнгги император сулоласига тегишли. Қонунбузар қўлга олинган ва психиатрия экспертизасига юборилган.

Фото: iStockphoto/Getty Images/File

Ветнамда маст эркак 200 йиллик импетарор тахтининг тирсакқўйгичини синдириб қўйди, деб ёзмоқда CNN. Артефакт миллий бойлик сифатида эътироф этилган, қонунбузар эса қўлга олиниб, психиатрия экспертизасига юборилган.

Қайд этилишича, тахт Ветнамнинг сўнгги императорлар сулоласи — Нгуен бошқарув даврига тегишли. Сулола 1802 йилдан 1945 йилга қадар ҳукмронлик қилган вақтида Хюэ шаҳри Ветнам пойтахти бўлган. Унинг ҳудудидаги ёдгорликлар (саройлар, мақбаралар ва ҳоказо) ЮНEСКОнинг Жаҳон мероси объектлари ҳисобланади.

Шикаст етказилган тахт Хюэнинг энг муҳим биносида — Тхай Хоа саройида жойлашган. Бу ер император саройи вазифасини ўтаган ва маросимлар ҳам айнан мазкур саройда ташкил этилган. Қонунбузар саройнинг ёпиқ ҳудудига 24 май куни тушдан кейин кирган ва тахтга ўтириб, тушунарсиз бақира бошлаган, охир-оқибат қимматбаҳо артефактни синдириб қўйган.

Давлат янгиликлари сайтига кўра, мамлакатдаги ёдгорликлар мажмуаси ҳудудида хавфсизлик чоралари кучайтирилмоқда, «айниқса артефактлар ва миллий хазиналарни ҳимоя қилишга алоҳида эътибор қаратиляпти».

#тахт #Ветнам #артефакт