Қўшимча функционаллар
-
Тунги кўриниш
NYT: Россия Запорижжя АЭСни ўз энерготизимига улашни режалаштирмоқда
Сунъий йўлдошдан олинган суратларга кўра, Россия феврал ойи бошидан бери босиб олинган Мариупол ва Бердянск ўртасида 80 километрдан ортиқ электр узатиш линияларини қурган.
Фото: Andrei Rubtsov/dpa/picture alliance
Россия Украинанинг босиб олинган жануби-шарқий қисмида уруш бошида эгалланган Запорижжя АЭСни ўз энерготизимига улаш мумкин бўлган электр тармоқларини қурмоқда. Бу ҳақда 27 май, сешанба куни Greenpeace экологик ташкилоти ҳисоботига таяниб, The New York Times нашри хабар берди.
Ҳисоботда эълон қилинган ва нашр томонидан тасдиқланган сунъий йўлдош суратлари шуни кўрсатадики, 2025 йил феврал ойи бошидан бери Россия Азов денгизи қирғоқлари бўйлаб босиб олинган Мариупол ва Бердянск ўртасида 80 км дан ортиқ электр узатиш линияларини қурган. Greenpeace маълумотларига кўра, қурилишдан мақсад Мариупол ҳудудидаги йирик нимстанцияга янги электр узатиш линияларини улашдан иборат бўлиб, у ўз навбатида ундан 220 км ғарбда жойлашган Запорижжя АЭСга уланган.
Greenpeace ядро энергетикаси бўйича мутахассиси Шон Берни NYT'га берган интервюсида сунъий йўлдошдан олинган суратларни Россия президенти Владимир Путиннинг Запорижжя АЭСни қайта ишга тушириш режаларининг биринчи фактик тасдиғи деб атади. Унинг фикрича, станция охир-оқибат Украина шарқидаги босиб олинган ҳудудлар билан чегарадош Ростов вилоятининг электр тармоқларига уланиши мумкин.
