Ўзбекистонда сунъий интеллект статистика тўплаш учун одамларга телефон қилади

Ўзбекистон Миллий статистика қўмитаси ва Корея Республикасининг Statistics Korea идораси 2025-2028 йилларга мўлжалланган “Статистика салоҳиятини ошириш” лойиҳаси доирасида ҳамкорлик бошлади.

Корея ҳукуматининг ривожланишга расмий ёрдам дастури (ODA) доирасида 3,8 миллион АҚШ доллари миқдоридаги грант асосида молиялаштириладиган ушбу лойиҳа Ўзбекистонда статистика тизимини модернизация қилиш, рақамли технологиялар ва халқаро тажрибаларни жорий этишга қаратилган.

Қўмита матбуот котиби Усмон Абдурасулов грант маблағлари нимага ишлатилиши ҳақида Kun.uz'га маълумот берди.

“Жанубий Корея томонидан Ўзбекистон Статистика қўмитасига ажратиладиган 3,8 млн долларлик грант қайтарилмайдиган маблағ ҳисобланади. Бу Ўзбекисотон ва Жанубий Корея ўртасида имзоланган ҳамкорлик келишуви доирасида амалга ошириляпти. Грант мабағлари асосий 4 йўналишга сарфланади. Биринчиси – кадрлар малакасини ошириш. Бунда хорижий экспертларни жалб қилган ҳолда ходимлар малакаси оширилади. Бундан ташқари, бизнинг ходимларимиз Кореяга бориб, малака ошириш мақсадида ўқув семинарларига қатнашиши мумкин. Кейинги йўналишда статистик тадқиқотлар институтида компютер ва аудио қурилмалар билан жиҳозланган замонавий ўқув хоналари ташкил этилади.

Учинчи йўналиш – CATI тизимини жорий этиш. Бу орқали телефон ёрдамида интервю ўтказиш тизими жорий этилади. Ушбу танланма кузатувларни тезкор, аниқ амалга ошириш имконини беради. Бизда ҳозир кузатув жараёнларида интервюлар олиш учун жойига чиқилади, ёки бошқа танланма кузатувлар объектга чиқиб ўтказилади. Сунъий интеллектга асосланган CATI тизими орқали одамларга автоматик телефон қилиб, саволларга жавоб олинади. Бу статистик кузатувлар учун вақт ва маблағни тежайди.

Тўртинчиси – маълумотлар интеграцияси. Статистик маълумотларни берадиган давлат органлари, масалан божхона, солиқ органларидан маълумотлар шаклланади. Маъмурий маълумотлар базаларини бошқариш тизими яратилиб, давлат органлари ўртасида маълумотлар интеграцияси таъминланади ва статистик таҳлиллар автоматлаштирилган, ишончли платформаларда амалга оширилади”, – деди Усмон Абдурасулов.

Корея статистикасини ривожлантириш институти лойиҳа менежери Ким Квангсупнинг сўзларига кўра, Корея томони Ўзбекистон барқарор ривожланиш мақсадларига эришишида ушбу лойиҳа орқали ўз ҳиссасини қўшмоқчи.