Собянин: Москва яқинида 30 дан ортиқ дрон йўқ қилинди

Москва 28 май, чоршанбага ўтар кечаси йирик дрон ҳужумига учради. 27 май кечки пайтдан 28 май соат 3.26 гача Россия пойтахти мэри Сергей Собянин Telegramʼда жами 33 та учувчисиз учиш аппарати томонидан қилинган ҳужумлар ҳақида маълум қилди.

Мэрнинг постларига кўра, бу дронларнинг барчаси ҳаво ҳужумидан мудофаа тизимлари томонидан йўқ қилинган. Собянин қайси объектлар уларнинг нишони бўлиши мумкинлиги ва ҳужумларнинг эҳтимолий оқибатлари ҳақида маълумот бермади.

Айни пайтда Росавиация вакили Артем Кореняко 28 майга ўтар кечаси Telegramʼда фуқаролик самолётлари парвозлари хавфсизлигини таъминлаш мақсадида аввалига Домодедово аэропортида, кейинроқ Внуково, Жуковский ва Шереметево аэропортларида ҳам уларнинг парвозига вақтинчалик чекловлар киритилганини ёзди.

Худди шундай чоралар Владимирдаги Семязино аэропортида, Ивановодаги Южний аэропортида, Костромадаги Сокеркино ва Ярославлдаги Туноша аэропортларида ҳам амалга оширилган, дейилади бошқа хабарда.

Айни пайтда "Москвач" Telegram-канали ярим тунда Москва вилоятидаги Троица ва Подолск шаҳарлари аҳолисига таяниб, у ерда «портлашлар» эшитилгани ҳақида хабар берди.