WSJ: Трамп Россияга қарши санкцияларни кучайтириш ҳақида ўйлаяпти

WSJ манбаларига кўра, Доналд Трамп Путиннинг Украинадаги ҳаракатлари ва тинчлик музокараларининг жуда секин суръатидан ҳафсаласи пир бўлган. У Россия президентига муносабатини қайта баҳоламоқда, деб ҳисоблайди нашр.

Фото: REUTERS/Maxim Shemetov/Illustration

АҚШ президенти Доналд Трамп Украинада ўт очишни тўхтатиш бўйича муваффақиятсиз уринишлардан сўнг шу ҳафтада Россияга қарши янги санкциялар киритиш масаласини кўриб чиқмоқда. Бу ҳақда 26 май, душанба куни Американинг The Wall Street Journal (WSJ) газетаси Трампга яқин манбаларига таяниб хабар берди. Уларнинг сўзларига кўра, Оқ уй раҳбари Россия президенти Владимир Путин томонидан Украинага қарши давом этаётган ҳужумлар, шунингдек, музокаралар жараёнининг сустлигидан тобора кўпроқ норози бўлмоқда.

Нашр манбаларидан бири таъкидлаганидек, янги чекловлар Россия банк секторига қарши чораларни ўз ичига олмайди. Шу билан бирга, Путинни музокаралар столида ён беришга мажбурлаш учун унга босим ўтказишнинг бошқа вариантлари, жумладан, Украина расмийлари томонидан қўллаб-қувватланган 30 кунлик ўт очишни тўхтатишга рози бўлиш ҳам муҳокама қилинмоқда.

Бироқ бу борада якуний қарор ҳали қабул қилинмаган ва Трамп янги санкциялар жорий этишдан бош тортиши мумкин, деб ёзади нашр.

#АҚШ #санкция #Владимир Путин #Россия #Доналд Трамп