Петербургда хорижликларга таксичи ва курьер сифатида ишлаш тақиқланиши мумкин

Россиянинг Санкт-Петербург шаҳри маъмурияти патентга эга меҳнат мигрантларига курьер ва такси ҳайдовчиси бўлиб ишлашни тақиқлашни режа қилмоқда. Губернаторнинг тегишли қарори коррупцияга қарши экспертизадан ўтказиш учун эълон қилинди, деб хабар берди «Фонтанка».

Қарорда меҳнат патентига эга бўлган хорижликларни 2025 йилдан бошлаб такси хизматлари ва ҳайдовчи билан автомобил ижараси ҳамда курьерлик етказиб бериш хизматларига жалб қилишни тақиқлаш таклиф қилинган. Тақиқ Петербургдаги барча компания ва ташкилотларга тегишли. Меҳнат ва бандлик қўмитаси кейинроқ тақиқни 2026 йилгача узайтириш бўйича таклиф киритиши мумкин, дейилади лойиҳада. Талаблар қонун кучга кирганидан кейин 3 ой ичида бажарилиши шарт.

Меҳнат патенти барча чет элликлар учун мажбурий эмас. ЕОИИ давлатларидан (Арманистон, Белоруссия, Қозоғистон, Қирғизистон) келган мигрантлар, яшаш учун рухсатнома ёки вақтинчалик яшаш учун рухсатномаси бўлган чет элликлар, қочқин мақомига эга бўлганлар ва бошқалар патентсиз ишлаши мумкин.

Қарор лойиҳасига курьерларга нисбатан янги талаблар ҳам киритилган:

- Скутерлар, электр велосипедлар ва шахсий ҳаракатланишнинг бошқа воситаларини ҳайдашда тезликни 15 км/соатдан ошириш тақиқланади;

- Айрим ҳудудларда курьерларнинг ҳаракати чекланади; уларнинг рўйхати транспорт қўмитаси томонидан тайёрланади;

- Чекланган ҳудудларда ҳаракат техник воситалар билан тўсиб қўйилади;

- Курьерлардан геолокацияни кузатиш учун мобил қурилмалар бўлиши талаб қилинади;

- Шунингдек, уларга идентификация рақамлари берилади, улар кийимлари, сумкалари ва транспортида кўрсатилади;

- Транспорт қўмитаси курьерларнинг ташқи кўринишига талабларни белгилайди; иш берувчилар уларнинг бажарилишини назорат қилишлари шарт;

- Шунингдек, курьерларнинг шахсий маълумотлари, шу жумладан идентификация рақамлари билан реестр тузилади.

Россиянинг бир қатор ҳудудларида чет эл фуқароларини такси ва курьерлик хизматлари соҳасида патент билан ишлашга чекловлар жорий этилган. Ушбу чора-тадбирлар Россия фуқароларини устувор ишга жойлаштириш ва хавфсизликни таъминлашга қаратилгани таъкидланган. Бироқ, шу вақтгача бундай чекловлар Москва ва Санкт-Петербургда жорий қилинмаган эди.