Reuters: АҚШ божлари сабаб дунё компаниялари кўрган зарар 34 млрд доллардан ошди

АҚШ президенти Доналд Трамп томонидан божлар жорий этилгач, дунё бўйлаб компаниялар 34 миллиард доллардан ортиқ маблағ йўқотди. Йўқотишлар юқори харажатлар ва савдонинг пастлиги билан боғлиқ, деб ёзади Reuters.

Агентлик S&P 500 индексидаги 32 та, Stoxx 600 дан учта, Nikkei 225 дан эса 21 та компания фаолиятини таҳлил қилиб кўрган. Доналд Трампнинг олдиндан айтиб бўлмайдиган савдо сиёсати туфайли компанияларнинг аксарияти ўз йўқотишларини аниқ баҳолай олмаган.

Шу билан бирга, 42 та компания ўз прогнозларида кўриладиган даромадни қисқартирган. Яна 16 таси ҳисоботларини чақириб олган ёки эълон қилиш санасини кўчирган. Хусусан, Walmart даромад бўйича чораклик ҳисоботни тақдим этишдан бош тортган ва товарлар нархини оширишини маълум қилган. Volvo яқин икки йил давомида даромадларига оид прогнозларни тақдим этмайди. United Airlines иккита турли ҳисоботни тайёрлади. Авиакомпаниядагиларга кўра, жорий йилда макроиқтисодий вазиятни олдиндан айтиб бўлмайди.

Оқ уйнинг маълум қилишича, савдо божлари Америка иқтисодиётига 50-60 миллиард доллар даромад олиб келган. 28 май куни АҚШ халқаро савдо бўйича федерал суди президент Трампнинг Хитой, Канада ва Мексикага нисбатан жорий этган божларини ноқонуний деб топди. Кейинроқ АҚШ Апелляция суди ушбу қарорни рад этди. Ҳужжатда айтилишича, чет эл маҳсулотларига божлар ўз кучида қолади.