Россия Мудофаа вазирлиги урушда шикастланган техникаларни металлолом учун сотмоқда

Россия Мудофаа вазирлиги Ростов вилоятида Украинага қарши урушда шикастланган ўнлаб ҳарбий техникани металлолом учун сотмоқда. "161.ру" минтақавий нашри "ГИС Торги" порталида учта лотнинг пайдо бўлганига эътибор қаратди: улардан биринчисининг бошланғич нархи 4,37 миллион рубл, иккинчиси — 4,39 миллион, учинчиси — 3,2 миллион. Мақолада таъкидланганидек, ишламайдиган ҳарбий техника сотувчиси Россия Мудофаа вазирлигининг «Мулк муносабатлари бўйича махсус ҳудудий бошқармаси» федерал давлат бюджети муассасаси ҳисобланади. 

The Moscow Time нашрининг таъкидлашича, вазирлик ушбу аукционларда расман «қора ва рангли металл» сотяпти, аммо аукционларга илова қилинган фотосуратларда шикастланган ҳарбий техникани таниб олиш осон. Лотларнинг тушунтириш матнида Т-80, Т72БЗ, Т62 танклари, пиёда аскарлар жанговар машиналари (БМП), шунингдек, турли модификациядаги бронетранспортёрлар (БТР) сотилаётгани айтилади. Хабарга кўра, бу «товар»ларнинг барчаси Ростов вилояти Мясниковский туманидаги Петровка қишлоғида жойлашган бўлиб, олиб кетиш шарти билан сотилади, бироқ бунга қадар харидор «қора металлоломларни харид қилиш, қайта ишлаш ва сотиш ҳуқуқини берувчи лицензия» тақдим этиши шарт. Кимошди савдоси 30 июнга белгиланган.

Украинада ҳарбий техникани йўқ қилишнинг тасдиқланган ҳолатларини кузатиб борувчи Oryx сайтига кўра, Россия Қуролли кучлари кенг кўламли ҳужум бошидан буён 21 883 та ҳарбий техникани йўқотган, улардан 16 766 таси йўқ қилинган, 895 таси шикастланган, 1 164 таси ташлаб кетилган ва 3 058 таси Украина қуролли кучлари томонидан эгаллаб олинган.