Microsoft Россия бозорини бутунлай тарк этяпти

Американинг Microsoft корпорацияси Россия бозорини бутунлай тарк этади. Унинг шуъба корхонаси "Майкрософт Рус" МЧЖ Москва арбитраж судига банкротлик тўғрисида ариза беришга тайёрланмоқда. Тегишли хабар 30 май, жума куни "Федресурс" порталида чоп этилди. Газпромбанк компаниянинг кредитори ҳисобланади.

"Майкрософт Рус"нинг судга мурожаат қилиш сабабларидан бири Газпромбанк томонидан берилган даъво бўлди. Январ ойида банк Microsoft'нинг Россия юридик шахсидан асоссиз бойиб кетиш ҳолатида 90,9 миллион рубл тўлашни талаб қилган эди. Иш материалларига кўра, даъволар 2021 йил сентябрида тузилган ва 2022 йил 12 сентябргача амал қиладиган техник кўмак шартномасига тааллуқлидир. Даъвогарга кўра, 2022 йил апрелидан бошлаб "Майкрософт Рус" компанияси тўловни тўлиқ олганига қарамай, шартнома бўйича ўз мажбуриятларини бажаришни тўхтатган.

Апрел ойида суд даъвони қисман қаноатлантирди: компания асоссиз бойигани учун 887 минг доллар ва фоиз сифатида яна 62 минг доллар — жами 949 минг доллар тўлашга мажбур бўлди. Суд, шунингдек, ҳақиқий тўлов амалга оширилгунга қадар кредитлар бўйича ўртача оғирликдаги фоиз ставкасидан келиб чиққан ҳолда фоизларни қўшимча ундириш тўғрисида қарор чиқарди.

Расмий равишда Microsoft Россия Федерациясидаги фаолиятини 2022 йилнинг баҳорида – Россиянинг Украинага ҳужумидан сўнг тўхтата бошлаган, бироқ яқин вақтгача компания мамлакатда қонуний иштирокини сақлаб келган. 2024 йил декабр — 2025 йил январ ойларида Россиянинг 13 шаҳрида, жумладан Москва, Санкт-Петербург, Екатеринбург, Новосибирск, Владивосток ва Краснодарда Microsoft филиаллари бутунлай ёпилди.

"Майкрософт Рус" МЧЖ Россиянинг Украинага бостириб киришидан сўнг ўз операцион фаолиятини кескин қисқартирди. Агар 2021 йилда даромад 6,9 миллиард рублни ташкил этган бўлса, 2024 йилда бу кўрсаткич 161,6 миллион рублга камайди. Шу билан бирга, бухгалтерия ҳисоботи маълумотларига кўра, компания 174,1 миллион рубл миқдорида соф фойдани кўрсатган.