Машҳурлар иштирокидаги футбол турнирида жанжал уюштирганлардан бири 10 суткага қамалди

Жар стадионида ўтган “Like Cup” лойиҳаси бир гуруҳ иштирокчилар ўзаро келишиб жанжаллашишган. Уларнинг мақсади ҳайп қилиш орқали ижтимоий тармоқ саҳифаларида обуначилар сонини кўпайтириш бўлган. Атайин уюштирилган жанжал ортидан 4 фуқарога жарима, 2 нафарига маъмурий қамоқ жазоси тайинланди.

Тошкент шаҳар ИИББ Шайхонтоҳур тумани Жар стадионида юзага келган жанжалли ҳолат юзасидан лавҳа эълон қилди. Унга кўра, “Like Cup” лойиҳаси доирасида санъаткорлар ва блогерлар ўртасида футбол бўйича ўтказилган ўйинда бир гуруҳ блогерлар ўзари келишиб, жанжаллашишган. 

Бошқарма жанжални келтириб чиқарганлар билан суҳбатлашиб, нима сабаб бу иш қилинганига изоҳ олган. Таъкидланишича, қатнашувчилар тўполон ортидан янада машҳурликка интилишган. 

“Ўзи бу олдиндан келишилган эди, мисол учун жанжаллашиб кетишимиз. Бу – пиар-да, шоу қилмоқчи бўлганман.

Мен энди янги чиққан блогерман, ўзимга хайп ишламоқчи бўлдим. Халқдан кечирим сўрайман, бу иш бошқа такрорланмайди”,– деган урушганлардан бири.

“Сал машҳурроқ бўлиб, сал даромадимни кўпайтириш мақсадида булар билан келишдик. Афсуски, кўпчиликка айтмаганимиз учун тушунишмаган экан.
Дўстим бориб [боши билан уришу] нима қилиш керак эди, мен бориб елка беришим керак эди, қочиб қолиши керак эди. Бу ишимиздан афсусдамиз.
Бу қилган ишларимиз бошқа қайтарилмайди”,– деган яна бири.

Вазият юзасидан Шайхонтоҳур тумани ИИО ФМБ томонидан текширув ўтказилиб, турнир иштирокчилари билан профилактик суҳбат олиб борилган. “Like Cup” лойиҳаси жамоатчилик ўртасида кескин эътирозлар келтириб чиқарганлиги ва ҳуқуқбузарлик содир этилишига сабаб бўлганлиги учун вақтинча тўхтатилган.

“Жуда катта хато бўлди, яъни биз ташкилотчилар томонидан ва қолаверса, мана шу эпизодни юзага келтирган айрим бир футболчилар тарафидан хунук ҳолат юзага келди ва бу ҳолат бир маданият ходими сифатида мени ўзимга жуда қаттиқ таъсир қилди. Биз тарафдан мана шуни назоратга ололмаганимиз, уларнинг ҳиссиётларини биз назоратга ололмаганимиз ташкилотчиларнинг катта хатоси бўлди деб ўйлайман. Халқимиздан ҳам шу йигитларни кўрсатган ҳунари учун узр сўрайман”,– деган лойиҳа ташкилотчиси Алишер Узоқов.

Жиноят ишлар бўйича Шайхонтоҳур туман судининг сайёр суд мажлисида Алишер Узоқов, Абдураҳмон Мавлонов, Нуржалол Раҳмоналиев ва Дилшодбек Ўрозбоев  МЖтКнинг 183-моддаси ҳамда 194-модданинг биринчи қисмида кўрсатилган ҳуқуқбузарликларни содир этганликда айбдор деб топилиб, тўрттала ҳуқуқбузарнинг ҳар бирига БҲМнинг 10 баробари миқдорида жарима жазоси тайинланган. 

Жанжалда қатнашган Озодбек Ўрозбоев эса МЖтКнинг 183- ҳамда 194-моддансиинг биринчи қисмида кўрсатилган ҳуқуқбузарликларни содир этганликда айбдор деб топилиб, 10 сутка маъмурий қамоқ жазоси тайинланган. 

Яна бир иштирокчи Камолиддин Мамажонов ҳам МЖтКнинг шу моддалари билан айбдор деб топилиб, БҲМнинг 12 баробари миқдорда жарима жазосига тортилган.