Киевнинг Истанбулдаги музокаралар учун таклифлари маълум бўлди

Reuters Украинанинг Москва билан Истанбулдаги музокаралари бўйича тинчлик таклифларини эълон қилди.

Фото: Francisco Seco/AP

Украина делегацияси 2 июн куни Истанбулда бўлиб ўтадиган музокараларда Россия томонига тақдим этишни режалаштираётган тинчлик таклифлари матни оммага эълон қилинди. Reuters бу ҳақда 1 июн, якшанба куни эълон қилди.

Киевнинг фикрича, осмонда, қуруқликда ва денгизда тўлиқ ва сўзсиз ўт очишни тўхтатиш мулоқот учун зарурий шарт бўлиши керак.

Ишончни мустаҳкамлаш учун барча ноқонуний кўчирилган украиналик болаларни сўзсиз қайтариш, ҳарбий асирларни «ҳамма учун ҳамма» тамойили асосида алмашиш ва «Россия томонидан гаровга олинган барча тинч аҳолини озод қилиш» керак», дейилади ҳужжатда.

Украина халқаро ҳамжамиятдан ишончли хавфсизлик кафолатларини олиши керак, дея таъкидланади матнда.

Киевни бетарафликка мажбурламаслик керак, дейилади Украина томонининг таклифларида. У Евроатлантика ҳамжамиятининг бир қисми бўлиш-бўлмаслигини ва ЕИга аъзо бўлиш йўлини ўзи танлаши мумкин.

«Украина Қуролли кучларининг сони, жойлаштирилиши ва бошқа параметрлари, шунингдек, Украина ҳудудига дўст хорижий давлатлар қўшинларини жойлаштириш бўйича чекловлар жорий этишга йўл қўйилмайди», — дейилади ҳужжатда.

#Украина #Истанбул #Россия