Дунёдаги энг катта айсберг ўз майдонининг яна 7 фоизидан айрилди

Дунёдаги энг катта А23а айсберги ўз майдонининг яна 7 фоизидан айрилди — ҳозирда унинг катталиги Москва шаҳридек, деб хабар беради Арктика ва Антарктика илмий-тадқиқот институти.

Қайд этилишича, айсберг бир неча кун ичида 60 километр масофани сузиб ўтган.

«Улкан А23а айсберги саёзликдан чиқиб, яна Жанубий океан сувларида сузишни бошлади. Июннинг илк кунларида океан оқимлари таъсирида А23а айсберги шарқий йўналишда 60 километр сузди ва ҳозир Анненков кимсасиз оролидан 74 километр узоқликда», — дейилади хабарда.

А23а айсберги Антарктида соҳилларидан 1986 йилда ажралиб чиққан, бироқ кўп ўтмай Ведделл денгизига «тиқилиб қолган». Ўттиз йил давомида у статик «муз ороли» сифатида турган, жойидан қимирламаган. 2020 йилга келиб у яна ҳаракатланишни бошлаган. Апрел бошларида А23а Антарктиданинг циркумполяр оқимига кириб қолганди — бу Ер юзидаги барча дарёларда оқадиган сувдан юз баробар кўпроқ сувни айлантирадиган улкан куч ҳисобланади. Ўтган йилнинг декабр ўрталарида А23а айсберги Скотия денгизидаги тузоқдан чиқиб, Жанубий океан томон ҳаракатланишни бошлагани тўғрисида хабар берилганди.

Жорий йилнинг февралида айсбергдан майдони 80 километр квадратга етадиган муз бўлаги ажралиб тушгани маълум бўлган эди.