Москва марказида чеченлар одам ўғирлашди

Москва марказида 3 июн куни кечқурун бир киши ўғирлаб кетилди. Бу ҳақда биринчи бўлиб «База» ва «Осторожно, новости» телеграм-каналлари хабар берди. Гувоҳларнинг сўзларига кўра, Ярославл вокзали яқинидаги майдонда бир неча киши бир кишини кўтариб, милтилловчи чироқ ва АМР серияли рақамлар ўрнатилган қора «Мерседес» юкхонасига тиқиб қўйган. Гувоҳларнинг видеосида спорт костюмлари ёки қора пиджак кийган бир неча соқолли эркаклар ўғирланган шахсни машина томон судраб кетаётгани, у «Ёрдам беринг!», «Керак эмас!» ва «Полиция!» деб бақирганини кўриш мумкин. «База» хабарида «акцентига қараганда», одам ўғрилари чеченистонликлар экани таъкидланган.

Кўп ўтмай ўғирланган шахс кимлиги маълум бўлди – Арег Шчепихин (турли маълумотларга кўра, у 39 ёки 40 ёшда). «Осторожно, новости» нашри ёзишича, Шчепихин Химкида яшайди, «ўзини тадбиркор, Россия қаҳрамони ва топ-менежер деб атайди». Телеграм-каналнинг аниқлашича, 2019 йилда у «Россия – имкониятлар мамлакати» танловида иштирок этган, кейин эса «ижтимоий тармоқларда ғалати постлар ёза бошлаган». «База»нинг таъкидлашича, Шчепихин ўзининг ижтимоий тармоқларида доимий равишда таниқли шахслар, жумладан, Путиннинг ёрдамчиси Владимир Мединский, ўзини ўзи мустақил деб эълон қилган ДХР раҳбари Денис Пушилин, ТИВ расмий вакили Мария Захарова билан тушган суратларини жойлаштириб келган.

Бундан ташқари, «База»нинг аниқлашича, Шчепихин бир неча марта чечен халқи, Аллоҳ ва Қуръонни ҳақоратлаб видео ёзган. Унинг онаси «База»га ўғли Тоғли Қорабоғдаги уруш туфайли ҳам мусулмонларга ва ислом динига «кескин салбий муносабатда бўла бошлаган». Аёлнинг сўзларига кўра, Арег урушда қатнашмаган, «аммо ўша воқеаларни фаоллик билан кузатиб борган ва урушнинг натижаларини жуда оғир қабул қилган». «Осторожно, новости»нинг ёзишича, Шчепихин навбатдаги ҳақоратли видеосини 3 июн куни эълон қилган. Видео «чечен блогерларга етиб борган ва улар видеони янада кенг тарқатиб», «ушбу эркакни тутиш ва жазолаш»ни талаб қилган, дейилади телеграм-канал хабарида.

Арег сўнгги видеосини 3 июн куни ўғирлаб кетилишидан бир неча дақиқа олдин ёзган. Унда у Ярослав вокзали бўйлаб юриб, блогерлар Дмитрий Портнягин ва Григорий Аветов ҳақида гапириб, «улар 10–15 йилдан буён гиёҳванд моддалар қабул қилиши»ни айтади. «Умуман олганда, „Трансформация“, „Бизнес-клуб 500“ [форумларини] ўтказган ушбу тўлқин ва Америка билан қисман алоқада бўлган ҳамда қандайдир муносабатларни сақлаб турган барча йигитлар – мамлакатимиз учун энг катта таҳдиддир», – дейди Шчепихин .

«База»нинг хабар беришича, ўғирликдан тахминан бир ярим соат ўтгач, қора «Мерседес» Киев шоссеси яқинида тўхтатилган. Бунгача уни Сколково ҳудудида қўлга олишга уринишган, бироқ у «таъқибдан қочиб кетган», деб ёзади нашр. Бироқ, ўғирланган шахс қаерда бўлгани – номаълум: дастлабки маълумотларга кўра, «Мерседес» тўхтатилган вақтда у машинада бўлмаган.

ТАСС агентлиги ҳуқуқ-тартибот идораларига таяниб хабар беришича, полиция ўғирлик бўйича текширув ўтказмоқда. «Ўғриларнинг шахси ва содир бўлган воқеа сабаби аниқланмоқда», – деган ТАСС суҳбатдоши. Агентлик бошқа тафсилотларни келтирмаган.

Шчепихин олиб кетилган автомобил 4 июн куни эрталаб Ярославл вокзалига қайтариб олиб кетилди, деб ёзади «База» ва Mash телеграм-каналлари. У ерда тергов ҳаракатлари олиб борилмоқда. Кейинроқ Shot телеграм-канали олти нафар шахс полиция бўлимидан чиқариб юборилаётгани акс этган видеони эълон қилди. Қўлга олинганларнинг уч нафари полициячиларга Росгвардиянинг амалдаги ходимлари эканликларини айтишган, деб ёзади телеграм-канал. Одам ўғрилари бўлимдан ўша «Мерседес»да жўнаб кетишган. Мухбирнинг ўғирланган шахс қаерда экани ҳақидаги саволига жавоб берилмаган.

Ўғрилар Росгвардия ходимлари экани, вазият эса «жиноят эмас, балки тезкор тадбир» эканини айтишган, деб хабар беради «Звезда» телеканали. Росгвардиянинг ўзи бу маълумотни тасдиқламаган ва рад ҳам этмаган.

Кейинроқ Чеченистон республикасининг миллий сиёсат, ташқи алоқалар, матбуот ва ахборот вазири Ахмед Дудаев Шчепихин «ўғирлаб кетилмагани, балки қўлга олингани»ни айтиб чиқди. Дудаевнинг сўзларига кўра, Чеченистон Республикаси Ички ишлар вазирлиги Шчепихинга нисбатан «диндорларнинг диний туйғуларини ҳақорат қилиш мақсадида» оммавий ҳаракатлар содир этгани учун Жиноят кодексининг 148-моддаси бўйича текширув ўтказмоқда. Дудаевнинг таъкидлашича, Шчепихин «очиқ, ошкора ва бир неча бор этник тозалаш ва нацизмга чақирган, дин ва Худони ҳақорат қилган, шунингдек, аниқ экстремистик қарашларни билдирган».

ИИВда маълум қилишларича, 3 июн куни кечқурун полициячилар Ярославл вокзалида «жамоатчилик норозилигига сабаб бўлган» олти нафар «воқеа иштирокчиси»ни қўлга олган. Идоранинг таъкидлашича, қўлга олинганлар Москва-Ярославская станциясидаги бўлимга олиб кетилган, текширув материаллари эса тергов органларига топширилган. Шунингдек, Ички ишлар вазирлиги ижтимоий тармоқларда Чеченистон аҳолисига нисбатан «провокацион баёнотлар билан видеолар» жойлаштирган «блогерга нисбатан» текширув бошлангани ҳақида хабар берди. Блогернинг исми келтирилмаган. ИИВнинг маълум қилишича, текширув Экстремизмга қарши курашиш бош бошқармаси ходимлари томонидан ўтказилмоқда.

«База» ва Shot телеграм-каналлари Шчепихин озодликда экани ҳақида хабар берди. «База» маълумотига кўра, уни ярим тунда қўйиб юборишган ва у Москвадаги ҳостеллардан бирида бўлиб турибди. «База» ўғирликдан кейин Шчепихин калтакланиб, видеода «тавба қилиш»га мажбурлангани ҳамда Украина билан алоқаларда айблангани ҳақида ёзган. Кейинроқ мазкур телеграм-каналда эълон қилинган видеода Шчепихиннинг ўзи «шубҳали номер, ёлғон мигалка ўрнатилган машинада, сурбетларча» ўғирлаб кетилгани ҳақида ҳикоя қилади. Роликда Шчепихиннинг юзида кўкариш ва шилинишлар борлигини кўриш мумкин. «Бунгача ҳам кичик жанжал бўлганди, мен полицияга қўнғироқ қилиб, тезда етиб келишни сўрадим. Вокзалда полиция таянч пункти бўлиши ёки ҳеч бўлмаганда жойларда бирорта ходим туриши керак эди – лекин улардан ҳеч ким йўқ эди», – дейди у.

Шчепихиннинг сўзларига кўра, уни «қаттиқ қийнашмаган, кўпроқ сўроқ қилишган». «Улар Украина билан қандайдир контакт ўрнатганманми ёки мухолифат билан алоқаларим бормилигига қизиқишди. Улар мени узоқ вақт давомида, тахминан бир йилдан бери ижтимоий тармоқларда қўрқитиб келишди. Ва мен ҳамиша сабр қилдим. Халқ менга „лапашангсан“ дея бошлади. Шундан кейин чидаб бўлмай қолди. Ва мен чеченларга ҳам, мусулмонларга ҳам жавоб қайтардим ва улар бунга реакция қилишди», – дея изоҳлайди Шчепихин.