Тожикистонда МДҲ давлатлари ҳукумат раҳбарлари кенгаши йиғилиши ўтказилди

Тожикистон пойтахти Душанбе шаҳрида 5 июнь куни МДҲ давлатлари ҳукумат раҳбарлари кенгаши йиғилиши ўтказилди. Унда Ўзбекистон бош вазири Абдулла Арипов иштирок этди.

Ҳукумат раҳбарлари кенгаши оғир машинасозлик саноатини ривожлантириш бўйича ҳамкорлик тўғрисидаги битимни маъқуллади. МДҲ Ижро қўмитаси матбуот хизмати хабарига кўра, ҳужжат саноат соҳасида ахборот ва илғор тажриба алмашиш, иқтисодиётнинг реал секторларида юқори малакали кадрлар тайёрлаш, янги технологик йўналишлар бўйича ҳамкорликни ривожлантириш, ишлаб чиқариш технологияларини модернизация қилиш ва бошқалар бўйича ишларни фаоллаштиришни назарда тутади.

«Келишувда ҳамкорликдаги фаолиятнинг асосий йўналишлари сифатида қуйидагилар белгиланган: оғир машинасозлик технологиялари ва ускуналарини инновацион ривожлантириш ва модернизация қилиш, металлургия, тоғ-кон, энергетика, нефть-газ ва кимё саноати учун машиналар, асбоб-ускуналар ва машиналар ишлаб чиқарадиган МДҲ давлатларининг машинасозлик тармоқларини ривожлантириш, шунингдек, йирик ўлчамдаги металл конструкциялар ва маҳсулотлар ишлаб чиқариш», дейилади хабарда.

Кенгаш аъзолари Енгил саноатда кооперацияни ривожлантириш концепцияси ва уни амалга ошириш бўйича чора-тадбирлар режасини ҳам тасдиқлади. Ҳужжатда ҳайвонот ва ўсимлик хомашёсини қайта ишлаш бўйича ҳамкорликни ривожлантириш, кимё ва нефть-кимё саноати билан ўзаро ҳамкорлик, иқтисодиётнинг турдош тармоқлари билан ҳамкорликни йўлга қўйиш кўзда тутилган.

Технологиялар ва ускуналарни модернизация қилиш, техник қайта жиҳозлаш, мавжудларини модернизация қилиш ва янги енгил саноат ишлаб чиқариш қувватларини яратиш ҳамда чиқиндиларни қайта ишлашни ривожлантириш режалаштирилган. Концепцияда енгил саноат маҳсулотларига қўйиладиган хавфсизлик ва сифат талабларини унификация қилиш, маълумот алмашиш марказларини ташкил этиш ва ҳоказолар бўйича ҳамкорлик қилиш таклиф этилади.

Бундан ташқари, ҳаво ҳаракатини бошқариш миллий тизимларини уйғунлаштириш бўйича янги Концепция муҳокама қилинди – амалдаги Концепция ўз кучини йўқотган деб топилиши керак, чунки у қабул қилинган кундан бошлаб ўтган 21 йил давомида авиация саноатида жиддий ўзгаришлар рўй берди.

Янги концепция миллий аэронавигация тизимлари ўртасидаги ўзаро ҳамкорлик жараёнини соддалаштириш мақсадида тартибга солиш қоидалари, стандартлари, тартиблари ва эксплуатацион тавсифларининг бир хиллигини таъминлашга қаратилган ҳаво ҳаракатини бошқариш миллий тизимларини уйғунлаштиришни таклиф қилади.

Кенгаш соғлиқни сақлаш соҳасидаги ҳамкорлик концепциясига қатор ўзгартириш ва қўшимчалар киритишни таклиф қилди. Аввало, «соғлиқни сақлашни муҳофаза қилиш» концепциясининг луғатига аниқлик киритилди, ҳамкорликнинг янги тамойиллари – ижтимоий-иқтисодий ривожланишга кўмаклашиш, халқаро ташкилотлар, беморлар ҳамжамиятлари, бизнес тузилмалари билан ҳамкорлик қилиш учун очиқлик белгиланди.

Концепция аҳоли саломатлигини сақлаш ва мустаҳкамлаш, аҳолида соғлом турмуш тарзини шакллантиришга қаратилган янги вазифалар билан тўлдирилди. Тиббиёт ва фармацевтика соҳасида қўшма амалий ва фундаментал тадқиқотлар, шунингдек, илмий инновацион ишланмаларни амалга ошириш режалаштирилган.