Тошкент метрополитени 6 июнь куни соат 3:00 дан 10:00 гача бепул ишлайди

Қурбон ҳайити куни барча йўловчиларга 7 соат давомида имтиёзли хизмат кўрсатилади.

Фото: Kun.uz

«Тошкент метрополитени» Қурбон ҳайити байрами кунлари поездлар қатнови ҳамда метро иш вақти бўйича маълумот берди.

Қайд қилинишича, 6 июнь – Қурбон ҳайити куни йўловчиларга қулайлик яратиш мақсадида Тошкент метрополитени одатдагидан икки соат олдин, яъни, тонгги соат 3:00 дан иш фаолиятини бошлайди. Бундан ташқари, Қурбон ҳайити байрами кунида Тошкент метрополитени соат 3:00 дан 10:00 га қадар йўловчиларга бепул хизмат кўрсатади.

Шунингдек, байрам муносабати билан белгиланган бошқа дам олиш кунларида қуйидагича тартибда поездлар ҳаракати йўлга қўйилади:

- 7 июнь — шанба куни учун белгиланган жадвал бўйича;

- 8 июнь — якшанба куни учун тасдиқланган жадвал асосида соат 05:00 дан хизмат кўрсатилади.

Олдинроқ Ўзбекистон мусулмонлари идораси Қурбон ҳайити намозининг ўқилиш вақтларини эълон қилганди. Унга кўра, Тошкент шаҳридаги жоме масжидларда эрталаб соат 5:10 да Қурбон ҳайити намози ўқилади.

Президент қарорига кўра, аҳолининг Қурбон ҳайити байрамини муносиб ўтказиши учун қулай шарт-шароит яратиш мақсадида 7 июн, шанба куни олти кунлик иш ҳафтаси тартиби бўйича ишлайдиган ходимлар учун қўшимча дам олиш куни этиб белгиланган.

#Тошкент #метро #Қурбон ҳайити