АҚШда бортида 20 киши бўлган самолёт қулаб тушди. Барча тирик қолди

Аварияга нима сабаб бўлгани ҳозирча номаълум. Самолётдан парашют билан сакраш бўйича машғулотларда фойдаланиб келинган.

Фото: Ижтимоий тармоқлар

Теннесси штатида бортида 20 киши бўлган самолёт фалокатга учради. Таллаҳома шаҳри расмийларининг маълум қилишича, авария ҳаво кемаси маҳаллий аэродромдан кўтарилганидан кўп ўтмай содир бўлган.

Қайд этилишича, самолёт бортида бўлган барча тирик қолган, тўрт нафар жабрланувчи вертолётларда шифохонага етказилган.

АҚШ Фуқаролик авиацияси федерал бошқармаси маълумотларига кўра, гап икки моторли De Havilland Canada DHC-6 Twin Otter самолёти ҳақида кетмоқда. Маҳаллий ОАВнинг ёзишича, ҳаво кемасидан парашют билан сакраш бўйича машғулотларда фойдаланилган.

Интернетда тарқалган кадрлардан кўриш мумкинки, самолёт дум қисмига шикаст етган ва қаноти узилган ҳолда ўтлоқ устида ётибди. Шаҳар маъмурияти вакили Лайл Расселнинг таъкидлашича, фалокат оқибатида аэропорт биноси ва бошқа иншоотларга шикаст етмаган.

Аварияга нима сабаб бўлгани ҳозирча номаълум. АҚШ Фуқаролик авиацияси федерал бошқармаси ва Транспортда хавфсизлик бўйича миллий кенгаш ўз терговларини бошлаган.

#АҚШ #самолёт