Дунёдаги энг қиммат 100 та IT-бренд қиймати 3,2 трлн долларга етди

Дунёдаги энг қиммат 100 та IT-бренднинг қиймати 3,2 триллион долларга етди — уларнинг 2,5 триллион доллари 44 та Америка брендига тегишли. Бу ҳақда Brand Finance тадқиқотида сўз боради.

Қайд этилишича, АҚШдаги брендларнинг улуши 77,9 фоизни ташкил этади. Хитойга тегишли 24 та бренд умумий қийматнинг 11,4 фоизини, 9 та Япония бренди — 2,1 фоизни, Жанубий Кореянинг 5 та бренди — 3,9 фоизни, Ҳиндистоннинг 5 та бренди эса 1,7 фоизни эгаллаган.

Apple кетма-кет иккинчи йил рейтингда биринчи ўринни эгалламоқда, унинг қиймати 11 фоизга — 574,5 миллиард долларгача ошган. Сўровларга кўра, истеъмолчиларнинг 80 фоиздан ортиғи ушбу бренд билан таниш, 45 фоизи эса Apple маҳсулотлари ёки хизматларидан фойдаланиш имкониятини кўриб чиқмоқда.

Рейтингда иккинчи ўринни Microsoft (+35 фоиз, 461,1 миллиард долларгача) эгаллади. Ундан кейинги поғоналардан Google (+24 фоиз, 413 миллиард долларгача), Amazon (+15 фоиз, 356,4 миллиард доллар), TikTok/Douyin (+26 фоиз, 105,8 миллиард доллар) ўрин олди.

Meta компаниясига тегишли Facebook эса 91,5 миллиард долларлик кўрсаткич билан олтинчи ўринга тушиб кетди ва Samsungʼнинг ўрнини эгаллади.

IT соҳада энг кескин ўсиш Nvidia брендида қайд этилди (+98 фоиз, 87,9 миллиард долларгача) — у ўтган йилги 10-ўриндан саккизинчи поғонага кўтарилди.