Россия ва Украина навбатдаги ҳарбий асирларни алмашди

Москва ва Киев яна ҳарбий асирлар алмашинувини амалга оширди, бу ҳақда уларнинг делегациялари Истанбулдаги музокаралар чоғида келишиб олганди. Бу ҳақда 10 июн, сешанба куни Украина президенти Володимир Зеленский ва Россия Мудофаа вазирлиги маълум қилди.

Бу алмашув «оғир яраланган ва ярадор аскарларимиз Россия асирлигидан қайтишининг биринчи босқичи бўлди», деди Зеленский. «Уларнинг барчаси тиббий ёрдамга муҳтож. Бу муҳим инсонпарварлик ҳаракати», — дея қўшимча қилди у. Сиёсатчининг таъкидлашича, Украина Қуролли кучлари, Миллий гвардия, Давлат чегара хизмати ва Давлат махсус транспорт хизмати ҳарбий хизматчилари алмашинув доирасида уйларига қайтган. «Алмашувлар давом этиши керак. Биз асирликда бўлганларнинг ҳар бирини топиб, қайтариш учун ҳамма нарсани қиляпмиз. Мен ёрдам бераётган барчадан миннатдорман», — деди Володимир Зеленский.

Украина ҳарбий асирлар билан ишлаш бўйича координация штабининг маълум қилишича, 10 июн куни озод этилган украиналиклар орасида «3 йилдан ортиқ асирликда ўтказган Мариупол ҳимоячилари ҳам бор. Аскарлар ва сержантлар билан бир қаторда офицерлар ҳам озод этилган». «Ҳозир озодликка чиққан барча ҳимоячилар оғир жароҳатлар ва оғир касалликларга эга: оёқ-қўллари кесилган, кўришда муаммолар, абсцесслар, инфекциялар, жароҳатлар ва сурункали касалликлар. Озод қилинганларнинг бир қисми гепатит ва сил касаллигига чалинган», дейилади хабарда.