Россия армияси Харкивни яна ўққа тутди

12 июнь, пайшанбага ўтар кечаси Россия армияси Харкив шаҳрини Shahed типидаги ҳужумкор дронлардан ўққа тутди, деди шаҳар мэри Игор Терехов ва Харкив вилояти ҳарбий маъмурияти раиси Олег Синегубов. Уларга кўра, ҳужум оқибатида камида 11 киши яраланган.

Тереховнинг сўзларига кўра, Россия ҳарбийлари бир кечада Харкивга 12 та зарба берган. УУАдан бири мактаб ҳудудига, иккинчиси кўп қаватли уйлар ҳовлисида жойлашган болалар боғчасининг ўйин майдончасига келиб тушган, деди Терехов. Бундан ташқари, Харкивнинг Салтовский туманидаги иккита турар жой биноси ва фитнес марказига зарба берилди.

Отишма оқибатида камида 11 киши, жумладан, тўрт нафар бола жароҳатланган, деди шаҳар мэри. «Турар жойлар, таълим муассасалари, болалар боғчалари, инфратузилма объектлари ўққа тутилди. Ўнлаб машиналар шикастланди, мактаблар ва уйларнинг ойналари синди», — дея санаб ўтди Терехов.

11 июн, чоршанбага ўтар кечаси маҳаллий вақт билан соат 00:31 дан 00:40 гача Россия Қуролли кучлари Харкивнинг икки тумани – Слободской ва Основянский туманларига 17 та Shahed учувчисиз учоқлари билан зарбалар берди. Дастлабки маълумотларга кўра, икки киши ҳалок бўлган, 54 нафари яраланган, ярадорлар орасида беш нафар бола ҳам бор. Бу ҳақда шаҳар мэри Игор Терехов Telegramʼда маълум қилди.

Мэрнинг сўзларига кўра, кўп қаватли ва хусусий уйлар, болалар майдончалари, корхоналар ва жамоат транспортига тўғридан тўғри зарба берилган. Бир қанча машиналар ёниб кетган, ойналари синган. Троллейбуслар, алоқа тармоғи, коммунал тармоқлар ва саноат объектлари шикастланган.