Путин: Киев аннексия қилинган ҳудудларни Россияга тегишли деб тан олишдан бош тортиши янги урушга олиб келиши мумкин

Россия президенти Владимир Путин Петербург иқтисодий форумининг ялпи сессиясидан сўнг Sky News Arabia телеканалига интервю берди. Унда у Россиянинг урушни тўхтатиш шартларини яна бир бор такрорлади.

Унинг қайд этишича, Москва Запорижжя ва Херсон областларининг аннексия қилинган қисмларида, шунингдек, ўзини ўзи мустақил деб эълон қилган ДХР ва ЛХРда ўтказилган «референдумлар» натижалари Киев томонидан тан олинишини талаб қилмоқда. Унинг фикрича, бу натижаларни эътиборсиз қолдириш «қуролли тўқнашувнинг қайта бошланиши эҳтимоли борлигини англатади».

Бундан ташқари, Путин Украина бетарафликка, яъни ҳеч қандай хорижий иттифоқларга қўшилмаслик ва ядро қуролини жойлаштиришдан воз кечишга рози бўлиши керак, деб ҳисоблайди. Россия президентининг фикрича, бундай қадамлар «минтақадаги узоқ муддатли барқарорлик» учун асосдир.

У Москва ва Киев 2022 йил баҳорида Истанбулда келишувга яқин бўлгани ҳақидаги сўзларини яна бир бор такрорлади.

«Умид қиламанки, Украинанинг ҳозирги раҳбарлари учинчи томоннинг эмас, миллий манфаатларни кўзлаган ҳолда иш тутади. <…> Украина Россияга қарши ишловчи ташқи кучлар қўлидаги қурол бўлишдан яхшироқ тақдирга лойиқ», — дея Путиннинг сўзларини келтиради Sky News Arabia. 

Кремл Қрим, ДХР, ЛХР, Запорижжя ва Херсон областлари Россия таркибига кириши тан олинишини талаб қилаётгани ҳақида 2 июн куни Истанбулда бўлиб ўтган тўғридан тўғри музокараларнинг иккинчи раундида россиялик музокаралар Украина томонига топширган меморандумда ҳам айтилганди.

Киевнинг тинчлик таклифида эса Украина бетараф бўлиб қолиши шарт бўлмаслиги ва Европа иттифоқига аъзолик учун ҳаракатларини давом эттириши мумкинлиги, НАТОга аъзолик эса алянсдаги консенсусга боғлиқлиги кўзда тутилган. Бундан ташқари, Украина 2014 йил февралидан буён Россия томонидан эгаллаб олинган ҳудудлар халқаро ҳамжамият томонидан тан олинмаслигини талаб қилган. «Ҳудудий масалалар фақат тўлиқ ва сўзсиз оташкесимдан кейингина муҳокама қилинади», — дейилган меморандумда.