Bloomberg: Оқ уй ишдан бўшатилган МХК ходимларини қайтармоқчи

Оқ уй АҚШ Миллий хавфсизлик кенгаши (МХК)га ходимларни ёллаш бўйича саъй-ҳаракатларни тиклади ва шу билан аввалроқ мамлакат президенти Доналд Трамп белгилаган идорани қисқартириш бўйича йўналишни тубдан ўзгартирди. Бу ҳақда 24 июн, сешанба куни хабардор манбаларга таяниб, Bloomberg агентлиги хабар берди.

Агентлик суҳбатдошларига кўра, МХК ходимларини қайта тиклаш АҚШ давлат котиби Марко Рубио кўрсатмаси билан амалга оширилмоқда. Май ойидан бери у АҚШ президентининг миллий хавфсизлик бўйича маслаҳатчиси вазифасини ҳам бажариб келмоқда. Рубио бу лавозимни МХКнинг собиқ раҳбари Майк Уолц истеъфога чиққанидан кейин эгаллади.

Bloomberg манбаларининг таъкидлашича, Трамп маъмурияти АҚШ президенти май ойи охирида «бир кунда» қисқартирган МХК ходимларининг камида бир қисмини қайтаришни таклиф қилмоқда. Агентлик тахминига кўра, бундай ҳаракатлар Трамп маъмуриятида сўнгги ойлардаги ташқи сиёсат масалаларини, жумладан, кескин АҚШ-Хитой муносабатларини, Исроилнинг Ғазо секторида давом этаётган ҳарбий амалиётини, АҚШнинг Эронга ҳужумлари оқибатларини ва Россиянинг Украинага қарши урушини ҳал қилиш учун зарур бўлган кадрлар етишмаслигидан далолат беради.

Шу билан бирга, Bloomberg суҳбатдошларидан бири МХКда содир бўлаётган воқеаларни ҳозирги сиёсий вазиятга тўғридан тўғри жавоб сифатида эмас, балки агентлик таркибини қайта қуриш деб таърифлайди.

Оқ уйдаги Миллий хавфсизлик кенгаши одатда АҚШ маъмуриятининг ташқи сиёсатини шакллантириш ва мувофиқлаштиришда муҳим рол ўйнайди ва Марказий разведка бошқармаси фаолияти тўғрисидаги маълумотлардан хабардор. Агентлик ходимлари, одатда, турли вазирликларнинг тажрибали мутасаддиларидир. Кенгаш таркибига сиёсий томондан тайинланганлар ҳам киради.

Доналд Трамп АҚШ президенти этиб қайта сайланганидан сўнг, республикачи ва собиқ ҳарбий офицер, бу иш учун тегишли тажрибага эга Майк Уолцни Миллий хавфсизлик кенгаши раҳбари этиб тайинлади. Гарчи Трамп МХКга қаттиқ ишонмайди ва унинг ходимлари етарлича содиқ эмас деб гумон қилса-да, у ва Уолц ўртасида очиқ тўқнашувлар бўлмаган.

Уолц март ойи охирида Signal мессенжеридаги гуруҳ суҳбатида АҚШ ҳарбий режалари муҳокамаси туфайли можарога аралашиб қолганидан кейин вазият бироз ўзгарди. Уолц тасодифан суҳбатга The Atlantic журналининг бош муҳаррири Жефри Голдбергни қўшиб қўйди. Журналист бир неча кун чатда бўлган ва Трамп маъмурияти вакиллари, жумладан, мудофаа вазири Пит Ҳегсет, давлат котиби Марко Рубио, вице-президент Жей Ди Вэнс, АҚШ Миллий хавфсизлик кенгаши аъзолари ва Уолцнинг ўзи Яман ҳусийчиларига қарши бўлажак операцияни муҳокама қилганини кўрган.

Трамп ўз маъмурияти ходимлари хавфсизлик протоколларини бузганини ва нопрофессионал иш тутганини тан олишдан бош тортди, аксинча, вазиятни ёритган журналистларни қоралади. Бироқ, Оқ уйдаги ОАВ манбаларига кўра, ўшандан бери Уолцнинг истеъфоси вақт масаласига айланди.

Май ойи бошида Трамп Уолцни АҚШнинг БМТдаги доимий вакили лавозимига ўтказди. Ўша ойнинг охирида эса МХКнинг юздан ортиқ ходими зудлик билан маъмурий таътилга жўнатилганлиги тўғрисида раҳбарларидан огоҳлантириш олди. NBC News хабарига кўра, ишдан бўшатишлар кенгашнинг 350 нафар ходимининг камида ярмига таъсир кўрсатган. Bloomberg шунингдек, май ойининг охиридан бери МХКда бор-йўғи бир неча ўнлаб одам ишлагани, Трамп эса АҚШ ташқи сиёсатини шакллантиришга ёрдам бериш ўрнига агентлик фаолиятини унинг буйруқларини бажариш учун қисқартиришга уринганини ёзади.