Crew Dragon космик кемаси тижорат экипажи билан ХКСга учиб кетди

Экипаж икки ҳафта давомида ХКСда бўлиши режалаштирилган. Бу вақт давомида астронавтлар унинг бортида 60 га яқин илмий тадқиқотларни амалга оширади.

Фото: SpaceX

Кўп марталик Crew Dragon кемаси Axiom Space компанияси дастури доирасида тўрт нафар турист билан Халқаро космик станция (ХКС) томон учиб кетди.

Қайд этилишича, Crew Dragon кемаси SpaceX компаниясининг Falcon 9 ташувчи ракетаси ёрдамида Флориданинг Канаверал бурнидаги космик марказдан учирилган.

Экипаж таркибидан Axiom астронавти ва NASA’нинг собиқ астронавти, командир Пегги Уитсон, кема учувчиси, Ҳиндистон вакили Шубаншу Шукла, Венгрия ва Полшадан келган мутахассислар Тибор Капу ҳамда Славош Узнански ўрин олган.

Кема экипажи икки ҳафта давомида ХКСда бўлиши режалаштирилган. Бу вақт давомида астронавтлар унинг бортида 60 га яқин илмий тадқиқотларни амалга оширади.

Falcon 9 ракетаси ёрдамида кеманинг учирилиши 29 майда амалга оширилиши керак эди, аммо техник сабаблар, об-ҳавонинг ноқулайлиги, шунингдек, статик синов вақтида суюқ кислород оқиб кетгани сабаб у қолдирилганди.

Axiom астронавтларнинг биринчи тижорий миссияси 2022 йилнинг апрелида амалга оширилган. Аввалига у 10 кунга мўлжалланган эди, аммо Флорида соҳилларида кузатилган ноқулай об-ҳаво сабаб тўрт нафар астронавт станцияда режадагидан бир ҳафта кўпроқ вақт ўтказди. Axiom 1 миссияси ҳар бир аъзосининг парвози 55 миллион долларга баҳоланган. Космик туристлар билан парвозларни йилда икки-уч марта амалга ошириш режалаштирилган.

#SpaceX #Crew Dragon