Эрон 400 килодан ортиқ бойитилган уранни АҚШ зарбаларидан яширишга улгурган — Европа разведкаси

Эрон АҚШ стратегик бомбардимончиларининг муҳим ядро объектларига берган зарбаларига қарамай, ядро бомбаларини яратиш учун яроқли бўлган бойитилган уран захираларини сақлаб қолишга муваффақ бўлди. Бу ҳақда Financial Times разведка маълумотларидан хабардор европалик икки амалдорга таяниб хабар берди.

Дастлабки баҳолашларга кўра, Теҳрон 60 фоизгача бойитилган уран захирасининг катта қисмини (408 килограмм атрофида) кўчириб, ҳужумдан олиб чиқишга улгурган. Таъкидланишича, материал Эроннинг Фордодаги асосий иккита бойитиш объектларининг бирида эмас, балки бошқа манзилларга тақсимланган бўлган.

Ҳозирда Европа Иттифоқи давлатлари ҳукуматлари Фордодаги корхонада етказилган зарар кўлами ҳақида разведка томонидан тайёрланаётган ҳисоботнинг тўлиқ версиясини кутмоқда. Мазкур корхона Кум шаҳри яқинидаги тоғ остида жойлашган. олдинроқ уран бойитиш мажмуасининг фақат ер устидаги қисми йўқ қилингани, унинг тубида жойлашган объектлар эса нисбатан бутун қолган бўлиши мумкинлиги айтилганди. Ўз навбатида Эрон расмийлари 22 июн куни Америка авиацияси томонидан амалга оширилган бомбардимондан аввал бойитилган уран захиралари кўчирилган бўлиши мумкинлигини тахмин қилганди.

Ҳафта бошида Исроил разведкаси ҳам шунга ўхшаш хулосаси билан бўлишганди. The New York Times манбаларига кўра, АҚШ зарбалари амалга оширилишидан бир неча кун олдин Эрон ядровий объектлар ҳудудидан тахминан 400 килограмм бойитилган уранни олиб чиққан. Ушбу чора АҚШ президенти Доналд Трампнинг Исроил томонида урушга киришиш билан боғлиқ таҳдидларидан кейин кўрилган. Манбаларнинг таъкидлашича, уран захиралари Исфаҳондаги ерости мажмуасида кичик контейнерларда сақланган ва уларни ўнлаб енгил машиналар юкхонасида олиб чиқиш мумкин бўлган.

Европа разведка маълумотлари Трампнинг бомбардимон Эроннинг ядровий дастурини «йўқ қилди» деган баёнотини шубҳа остига олади. «Фордо ядровий мажмуасидан ҳеч нима олиб чиқилмади. Бу жуда кўп вақт талаб қилган бўларди, жуда хавфли ва ташиш жуда оғир!», — деб ёзганди президент Трамп Truth Social саҳифасида пайшанба куни.

Шунингдек, Трамп куни кеча Америка ОАВни танқид қилганди. Трампнинг фикрича, улар Эроннинг ядровий дастури бор-йўғи бир неча ойга орқага сурилди, деган АҚШ разведкасининг ишончсиз маълумотларини тарқатган. Бу воқеадан сўнг Оқ уй Конгрессга махфий маълумотларни тақдим этишни чеклашини маълум қилди — айнан Конгресснинг ахборот тизими орқали разведка маълумотлари журналистлар қўлига тушган. 26 июн куни Пентагон раҳбари Пит Ҳегсет ҳам ОАВни танқид қилди.