Трамп Эрон олий раҳбарини «шармандали ўлимдан» қутқарганини айтди

АҚШ президенти Доналд Трамп Эрон олий раҳбари Али Хоминаий томонидан АҚШ ва Исроил мағлуб этилгани ҳақида берилган баёнотини кескин танқид қилди.

Трамп Хоминаий сўзларини «ёлғон» деб атади ва у шахсан Эрон олий раҳбарининг ўлимининг олдини олганини таъкидлади. Жумладан, у Теҳронни бомбардимон этмоқчи бўлган Исроилнинг бир қанча самолётларини орқага қайтаришни талаб қилганини айтди.

«Мен уни ўта даҳшатли ва шармандали ўлимдан қутқардим ва у «раҳмат, президент Трамп» дейишига ҳам ҳожат йўқ», деб ёзди АҚШ раҳбари Truth ижтимоий тармоғида.

Трамп, шунингдек, яқинда Эронга қарши санкцияларни бекор қилиш устида иш олиб борганини, аммо «ғазаб, нафрат ва жирканчга тўла баёнотларни» олганини, шундан сўнг, чекловларни олиб ташлаш ҳаракатларини тўхтатганини айтди.

Аввалроқ Reuters агентлиги Трамп Исроилнинг Хоминаийни ўлдириш режасига «вето қўйгани» ҳақида хабар берганди.

Исроил 13 июндан бошлаб, Эронга зарба бериб, бошқа нарсалар қатори ядровий дастур объектлари, юқори мартабали ҳарбий амалдорлар ва ядровий олимларни нишонга олди. Эрон бунга жавобан Исроилга ракета ва дронларни учирди.

22 июн куни АҚШ Эроннинг учта ядровий объектига зарба берди, икки кундан кейин эса Эрон Қатардаги Америка ҳарбий базасига ҳужум қилди. 24 июн куни Исроил ва Эрон ўт очишни тўхтатишга келишиб олди.

Эрон олий раҳбари Али Хоминаий 26 июн куни халққа мурожаат қилиб, мамлакатни Исроил ва АҚШ устидан қозонилган ғалаба билан табриклади.