АҚШда ёзувчилар Microsoft компаниясини судга берди

Улар технологик компания ўзининг Megatron сунъий интеллект моделини ўқитишда асарларнинг ноқонуний қўлга киритилган рақамли нусхаларидан фойдаланганликда айбланмоқда.

Фото: Reuters

АҚШда бир неча ёзувчи Microsoftʼга қарши Ню-Йорк Федерал судига даъво аризасини киритди. Компания Megatron номли сунъий интеллектини ўқитишда асарларнинг ноқонуний қўлга киритилган рақамли нусхаларидан фойдаланганликда айбланмоқда, деб ёзади Reuters.

Даъво аризасини имзолаганлар қаторида Кай Берд, Жиа Толентино, Дэниэл Окрент каби ёзувчилар ҳам бор. Аризада таъкидланишича, Microsoft ўзининг сунъий интеллектини ўқитишда муаллифлар розилигисиз қарийб 200 мингта китобдан иборат маълумотлар базасидан фойдаланган. Даъвогарларнинг сўзларига кўра, ушбу материаллар матнлар, муаллифлик услубига, лексика, синтаксис ва ўзгаларнинг асарлари мавзусига тақлид қилишга қодир генерацияни амалга ошириш қобилиятига эга моделни яратишга ёрдам берган. Уларнинг фикрича, гап муаллифлик ҳуқуқларининг кенг кўламли бузилиши ҳақида кетмоқда.

Судга шикоят Калифорния судининг Anthropic технологик компаниясига қарши шунга ўхшаш иш юзасидан қарор қабул қилганидан бир кун ўтиб киритилган. Федерал судя компания ўзининг СИ моделларини эълон қилинган китоблар асосида, муаллифлар рухсатисиз ўқитиш ҳуқуқига эга дея техногигант фойдасига қарор чиқарган. Мазкур қарор АҚШда бу турдаги биринчи ҳодисага айланди.

Даъвогарлар Microsoft ўзининг сунъий интеллектини уларнинг ишларидан фойдаланган ҳолда ўқитишни тўхтатиши кераклигини талаб қиляпти. Улар компенсация сифатида ҳар бир асар учун 150 минг доллар талаб қилган. Етказилган эҳтимолий зарар суммаси ҳозирча ошкор этилмаган. Даъвогарлар ғалаба қозонадиган бўлса, бунинг оқибати бутун сунъий интеллект соҳасига таъсир кўрсатиши мумкин.

Microsoft юристлари судга киритилган даъвога изоҳ бермади. Муаллифлар гуруҳи автокати ҳам ишнинг ўзига хослигидан келиб чиқиб, маълумот беришдан бош тортган.

#Microsoft #сунъий интеллект