Москва марказида ичида ФСБ ветеранлари бўлган машина портлаб кетди

Москва марказидаги Старопименовский тор кўчасида ичида Россия махсус хизматларининг ветеранлари — СССР Давлат хавфсизлик қўмитасининг 80 ёшли фахрийси ҳамда унинг қизи — Федерал хавфсизлик хизматининг (ФСБ) собиқ ходими бўлган автомобил портлаб кетди, деб хабар беради Mash.

Маълумотларга кўра, аёл фавқулодда хизмат ходимлари етиб келгунга қадар олов эгаллаб олган машина ичида отасини чиқариб олишга муваффақ бўлган. Кейинроқ у ўтган ой транспорт воситасини техник хизмат кўрсатишдан ўтказганини, жумладан, кондиционерини тўғрилаб, янги сигнализация ўрнатганини маълум қилган.

Гувоҳлар бир нечта портлаш овозини эшитганини таъкидлаган. Юзага келган ёнғин оқибатида иккита машинага шикаст етган. Ёнғин зудлик билан бартараф этилган. Ҳозирча жабрланганлар тўғрисида маълумот келиб тушмаган.

Москвада июн бошларида бир кун ичида учта автомобил «миналаштирилган» эди — учала ҳолат ҳам шаҳарнинг ғарбий ҳудудида, бир-бирига яқин жойда содир бўлган. Аммо воқеа жойига етиб борган мутахассислар портловчи мосламалар бўлганини тасдиқламаган.

Эслатиб ўтамиз, апрел охирларида Москва яқинидаги Балашиха шаҳрида кўп қаватли турар жой биноси ҳовлисида автомобил портлаб кетганди. Ўшанда автомобилга ўрнатилган портловчи қурилма ҳаракатга келтирилиши оқибатида РФ Қуролли кучлари Бош штаби бош оператив бошқармаси бошлиғи ўринбосари Ярослав Москалик ҳалок бўлган эди.