«Бу ҳазилми?» – перуликлар президент маошининг икки баравар оширилганини кескин муҳокама қилишяпти

Перу президенти Дина Болуарте ўз ойлик маошини икки бараварга кўпайтириб, тахминан 10 минг АҚШ долларига етказмоқчи. Reuters’нинг ёзишича, бу қарор кўплаб перуликларнинг ғазабини қўзғатяпти.

Мамлакат Иқтисодиёт вазирлигининг эълон қилишича, Болуартенинг маоши 35 568 солга (10 067 доллар) кўтарилди. Бу миқдор Перудаги энг кам иш ҳақидан тахминан 30 баравар юқори.

Қайд этилишича, президентнинг маоши аввал 15 600 сол (4400 доллар) бўлган. Бу миқдор 2006 йилда собиқ президент Алан Гарсия уни 42 000 солдан пасайтирганида жорий қилинган.

Иқтисодиёт вазири маошлар оширилиши аллақачон Вазирлар Маҳкамаси томонидан тасдиқланганини маълум қилди. Ҳукумат ўсишни Лотин Америкасидаги 12 та ҳамкасби билан солиштирганда унинг аввалги маоши фақат Боливия президентиникидан юқори экани ва 11-ўринни эгаллагани билан изоҳлаган.

Reuters ҳукумат берган маълумотлар қанчалик ҳақиқатга тўғри келишини мустақил равишда текшира олмаган. Ўтган йили эълон қилинган Рио Тимес баҳолашларида Лотин Америкаси президентларининг маоши 3 минг доллардан 22 минг долларгача, ўртача 9,6 минг доллар атрофида экани кўрсатилган.

«Бу – ҳазил. Перу бўйлаб ўта қашшоқлик ҳукм сурмоқда ва президент ўрнак кўрсатиши керак», дея таъкидлаган нафақахўр Роландо Фонсека.

Перу иқтисодиёти сўнгги икки йил ичида Болуарте даврининг бошида ҳукуматга қарши норозилик намойишлари туфайли юзага келган таназзулдан сўнг тикланди. Бироқ СОВИД-19 пандемияси даврида ёмонлашган қашшоқлик даражаси 30 фоизга яқинлигича қоляпти. Болуарте кейинги йилнинг апрел ойидаги сайловлардан кейин 2026 йил июл ойида ўз ваколатларини тугатади.

«У кетиш арафасида ва маошини оширишнинг ҳожати йўқ, касалхоналар ва бемор болаларга ёрдам кўрсатиши керак», дея Reuters Лимадаги уй бекаси Кармен Хуареснинг фикрини келтириб ўтган.

Болуарте 2022 йил охирида ҳокимиятга келганди. Datum ва Ipsos Peru томонидан ўтказилган сўровномаларга кўра, унинг маъқуллаш рейтинги 2 фоиздан 4 фоизгача бўлиб турибди.

У коррупция, хусусан, Ролех соатлари билан ноқонуний бойиш айбловларига дуч келган. Шунингдек, полиция ва ҳарбийларнинг 50 дан ортиқ одам ҳалок бўлган ҳукуматга қарши намойишларга муносабатини назорат қилишдаги роли бўйича тергов қилинган.

Болуартега импичмент эълон қилиш бўйича кўплаб уринишлар уни қўллаб-қувватловчи консерватив сиёсий партиялар томонидан тўхтатилган.

Маълумот учун, Перуда 2018 йилдан бери олти нафар президент ишлаган бўлиб, уларнинг уч нафари айни пайтда қамалган.

Мухолифат вакили Хайме Кито Конгрессда иш ҳақини оширишни бекор қилиш ташаббусини илгари суришни режалаштираётганини айтди.

«Бу шундай жиддий муаммоларга дуч келаётган мамлакат устидан кулишдир», деди у.