Запорижжя АЭСда Россия зарбаси туфайли блэкаут юз берди

Россия армияси Запорижжя атом электр станциясини Украинанинг ягона энергетика тизими билан боғловчи электр узатиш линиясига зарба берди, деб хабар қилди Украина Энергетика вазирлиги раҳбари.

Фото: Dmytro Smolyenko/Ukrinform/picture alliance

Украина энергетика вазири Герман Галушченко 4 июл, жума куни Россиянинг ўққа тутиши натижасида Запорижжя атом электр станцияси (ЗАЭС) тўлиқ қувватсизлангани ҳақида хабар берди. «Душман вақтинча ишғол қилинган ЗАЭСни Украинанинг ягона энергетика тизими билан боғлайдиган электр тармоғига зарба берди. Бу линия радиация хавфсизлиги даражасини таъминлашга имкон берган», деб ёзди у Facebookʼда.

Галушченконинг сўзларига кўра, Россиянинг Украинага кенг миқёсли бостириб кириши бошланганидан бери Запорижжя АЭС саккиз марта блэкаутга учраган ва бир неча бор блэкаут хавфи ёқасида қолган. «Бу россияликларнинг навбатдаги ядровий террор акти!» - деб таъкидлади вазир.

Украина атом электр станциялари оператори "Энергоатом" Россиянинг Украина ҳудудига зарбаси туфайли босиб олинган Запорижжя АЭСни Украина электр тармоғидан таъминловчи охирги электр узатиш линияси шикастланганини маълум қилди. Тўлиқ блэкаут сабабли Запорижжя АЭС ўзининг дизел генераторларидан қувват манбаига ўтди.

Атом энергияси бўйича халқаро агентлик (АЭХА) маълумотларига кўра, реакторлардаги ёнилғини совитиш учун Запорижжя атом электр станциясини электр энергияси билан таъминловчи барча ташқи линиялар узилган. «Запорижжя АЭС ҳозирда фавқулодда дизел генераторларида ишламоқда, бу эса ядро хавфсизлигининг ўта беқарор аҳволини кўрсатмоқда», — деди АЭХА бош директори Рафаэл Гросси ижтимоий тармоқда.

#АЭС #Россия #Запорижжя