Исроил армияси ҲАМАСнинг олти нафар қўмондони ўлдирилганини маълум қилди

Ҳозирда Исроил Мудофаа армияси ҲАМАСнинг ҳарбий-денгиз кучларига қарши ҳарбий операциялар ўтказмоқда.

Фото: IDF

Исроил Мудофаа армияси (ЦАҲАЛ), Разведка бошқармаси, Миллий хавфсизлик агентлиги ва Жанубий қўмондонлик ҳамкорлигида ўтказилган операция давомида ҲАМАС ҳарбий-денгиз кучларининг олти нафар қўмондони ўлдирилди.

«Йўқ қилинган террорчилар «Темир қиличлар» уруши вақтида Исроил фуқаролари ва хавфсизлик кучларига қарши денгизда террорчилик актларини режалаштирган. Уларнинг бир қанчаси 7 октябр қирғини режалаштиришда иштирок этган», — дейилади ЦАҲАЛ хабарида.

Қайд этилишича, ҳозирда Исроил Мудофаа армияси ҲАМАСнинг ҳарбий-денгиз кучларига қарши ҳарбий операциялар ўтказмоқда. Исроил армияси ҳарбий кемалар, қурол-яроғ омборлари ва ҲАМАС активларига боғлиқ бошқа «кўп сонли террорчилик нишонлари»ни блокламоқда.

1 июл куни Исроил Мудофаа армияси Ғазо секторидаги ҳарбий операциясини кенгайтиргани ва ўнлаб «террочилар ва юзлаб террорчилик инфратузилмаси объектлари» йўқ қилингани маълум бўлганди. Ҳарбий-ҳаво кучлари бир суткада анклавдаги 140 та ҳарбий нишонга ҳужум қилган.

#Исроил #ҲАМАС