Расман: Тошкент пропискаси ҳақидаги қонун бекор қилинмоқда

“Тошкент шаҳри ва Тошкент вилоятида доимий яшаш жойи бўйича рўйхатга олиниши лозим бўлган шахслар – Ўзбекистон Республикаси фуқаролари тоифаларининг рўйхати тўғрисида”ги қонун 2025 йил 12 октябрдан бошлаб ўз кучини йўқотади.

Шу санадан эътиборан, “Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисида”ги, президент томонидан 10 июл куни имзоланган қонун кучга киради.

Кучини йўқотадиган қонунда Тошкент шаҳри ва Тошкент вилоятида доимий яшаш жойи бўйича рўйхатга олиниши лозим бўлган фуқароларнинг 12 хил тоифаси белгиланган эди. Уч ойдан кейин бу тартиб бекор қилиниб, бутун Ўзбекистон ҳудудида ягона қоидалар амал қила бошлайди.

Янги қонуннинг 3-моддасига кўра, яшаш жойи ва турган жойи бўйича рўйхатдан ўтказиш – рухсат этиш хусусиятига эга эмас, деб белгиланди. Бу билан, Ўзбекистон фуқаролари бошқа жойга кўчганда, кўчиб борган жойида рўйхатда туриш учун давлатдан рухсат сўраши эмас, балки давлатни хабардор қилиши тартиби жорий этилмоқда.

Қонунга кўра, фуқаролар яшаш жойи ва турган жойи бўйича рўйхатдан ўтиши шарт. Шахснинг яшаши учун унга жой берган мулкдор (ёки турар жойни тасарруф этиш ҳуқуқига эга шахс) – унга қарашли жойда яшай бошлаган шахсни ўз вақтида рўйхатдан ўтказиши керак.

Регистрация муддатлари:

• Ўзбекистон фуқаролари, Ўзбекистонда доимий яшовчи чет эл фуқаролари ва фуқаролиги бўлмаган шахслар ўз яшаш жойи ёки турган жойи ўзгарган тақдирда, янги яшаш жойига ёки турган жойига келган кундан эътиборан 10 иш кунидан кечиктирмай, яшаш жойи ёки турган жойи бўйича рўйхатдан ўтиши шарт.
• Ўзбекистоннинг хорижда доимий яшовчи фуқаролари Ўзбекистонга кирган кундан эътиборан 10 иш кунидан кечиктирмай, яшаш жой ёки турган жойи бўйича рўйхатдан ўтиши шарт.
• Ўзбекистонда доимий яшамайдиган чет эл фуқаролари ва фуқаролиги бўлмаган шахслар Ўзбекистонга кирган кунидан эътиборан, агар Ўзбекистоннинг халқаро шартномалари ва қонунчилигида бошқача муддат назарда тутилмаган бўлса, 3 иш кунидан кечиктирмай турган жойи бўйича рўйхатдан ўтиши шарт.

Янги қонунга асосан, Ўзбекистон фуқаролари яшаш жойи бўйича рўйхатдан ўтиш учун ички ишлар органларининг миграция ва фуқароликни расмийлаштириш бўлинмалари ёки давлат хизматлари марказларига борган ҳолда, ёхуд ЯИДХП орқали онлайн тарзда хабардор қилиши керак.

Болани ўз ота-онасининг ёки ота-онасидан бирининг яшаш жойи ёки турган жойи бўйича рўйхатдан ўтказишда турар жой мулкдорининг (мулкдорларининг) аризаси (розилиги) талаб этилмайди.

Турган жойи бўйича рўйхатдан ўтказишда, солиқ органларида ҳисобга олинган турар жойнинг ижара шартномаси тақдим этилганда, турар жой мулкдорининг (мулкдорларининг) аризаси (розилиги) талаб этилмайди.

Ўзбекистон фуқаросининг яшаш жойи бўйича рўйхатдан ўтганлигининг мавжуд эмаслиги – уни турган жойи бўйича рўйхатдан ўтказишни рад этиш учун асос бўлмайди.

Ўзбекистон фуқаросини яшаш жойи ёки турган жойи бўйича рўйхатдан ўтказиш тўғрисидаги аризани кўриб чиқиш муддати 1 иш кунидан ошмаслиги керак. Рўйхатдан ўтган шахсга электрон ва (ёки) қоғоз шаклидаги маълумотнома расмийлаштирилади.

Агар турган жойи бўйича рўйхатдан ўтганлик муддати тугаган бўлса, аммо шахс ушбу жойда бўлишда давом этса, у 10 иш куни ичида турган жойи бўйича янгидан рўйхатдан ўтиши зарур.

Қонунга кўра, рўйхатдан ўтказишда уй-жой майдонининг ижтимоий нормасига риоя қилиш талаб этилади.