Қозоғистонда келин ўғирлаганлик учун жиноий жавобгарлик жорий қилинди

Қозоғистон президенти Қосим-Жўмарт Тўқаев сталкинг (ноқонуний таъқиб қилиш) ва келин ўғирлаганлик учун жиноий жавобгарликни назарда тутувчи қонунни имзолади, деб хабар берди Tengrinews.

Қонун лойиҳаси жиноий-ижро қонунчилигини такомиллаштиришга қаратилган ўзгартишларнинг тўртта блокини ўз ичига олади ва тез орада матбуотда эълон қилинади.

Ҳужжатда биринчи марта «сталкинг» таърифи келтирилган - бу шахсни унинг иродасига қарши алоқа ўрнатиш ва (ёки) кузатишга қаратилган ҳаракатларда ифодаланган, зўравонлик билан боғлиқ бўлмаган, катта зарар етказган ноқонуний таъқиб. Бундай қилмиш учун жарима ёки 90 суткагача қамоқ жазоси қўлланилиши мумкин.

Худди шу қонун билан Жиноят кодексига келин ўғирлаш учун жавобгарлик (модда «Никоҳга мажбурлаш» деб номланади) киритилди – бунинг учун жарима, ахлоқ тузатиш ишлари, эркинликни чеклаш ва жиноятнинг оғирлигига қараб 10 йилгача озодликдан маҳрум қилиш билан жазоланади.

Шу пайтгача Қозоғистонда бундай ишлар бўйича айбланувчилар одатда одам ўғирлаш моддаси бўйича судланар, унда 15 йилгача озодликдан маҳрум қилиш жазоси назарда тутилган эди. Аммо ўғирланган аёлни ўз ихтиёри билан озод қилган шахс, агар унинг ҳаракатларида бошқа жиноят таркиби бўлмаса, жавобгарликдан озод қилинарди.

Аввалроқ, Қосим-Жўмарт Тўқаев Миллий қурултой йиғилишида Қозоғистонда келин ўғирлаш ҳолатларини қаттиқ қоралади.

«Мамлакатимизда гўёки миллий урф-одатларни баҳона қилиб, келин ўғирлаш амалиётини татбиқ этишга уринаётганлар ҳам борки, бундай хурофотни умуман оқлаб бўлмайди. Бу прогрессив жамият идеалларига, жумладан, ҳар бир инсоннинг қадр-қиммати, ҳуқуқ ва эркинликлари мутлақ устун турадиган жамиятга зид келади. Бундай фактлар нафақат маънавий қоралашни, балки ҳуқуқий баҳо беришни ҳам талаб қилади», деган эди президент.