Украина Россияга музокараларнинг янги раундини ўтказишни таклиф қилди

Украина Миллий хавфсизлик ва мудофаа кенгаши котиби, собиқ мудофаа вазири Рустем Умеров Россия томонига келаси ҳафта, яъни 21-27 июл кунлари Истанбулда музокараларнинг учинчи раундини ўтказишни таклиф қилди, деди Украина президенти Володимир Зеленский 19 июл якунлари бўйича мурожаатида.

«Музокаралар динамикасини ошириш керак. Ўт очишни тўхтатишга эришиш учун ҳамма нарсани қилиш керак. Россия томони ҳам ечимлардан қочишни бас қилиши керак», – деди Зеленский. У музокаралар ҳарбий асирларни алмашиш, болаларни қайтариш ва «қотилликларни тўхтатиш»га бағишланиши кераклигини қўшимча қилган.

Зеленскийнинг фикрича, учрашувни «етакчилар даражасида» ўтказиш керак. У бу «ҳақиқатан ҳам узоқ муддатли тинчликни таъминлаш учун» зарурлигини айтиб ўтган. У бундай учрашувга тайёрлигини қўшимча қилди. Аввалроқ Украина президенти Владимир Путин билан алоҳида учрашув, шунингдек, Путин ва Доналд Трамп билан уч томонлама учрашув ўтказишни таклиф қилганди.

ТАСС агентлигининг Россия музокаралар гуруҳига яқин бўлган манбаси Украина Россияга музокараларнинг янги раундини келаси ҳафта ўтказишни таклиф қилганини тасдиқлади. Агентликнинг яна бир манбаси маълум қилишича, «сана ҳали йўқ, келишилади». Кремл ва Россия Ташқи ишлар вазирлиги ҳозирча Зеленскийнинг таклифига изоҳ бермади. Шу билан бирга, Россия президенти матбуот котиби Дмитрий Песков 18 июл куни Россия «музокаралар жараёнига динамика қўшиш» тарафдори эканлигини айтди.

Истанбул Россия ва Украина ўртасидаги музокаралар раунди учун майдон бўлиб қолади, деб хабар берди Россия Мудофаа вазирлигининг «Звезда» телеканали манбаси.

Германиянинг Der Spiegel нашри «Украинанинг янги ташаббуси ортида АҚШ билан келишувлар турган бўлиши мумкинлиги»ни тахмин қилди. Якунланган ҳафта бошида Киевга АҚШ президентининг Украина бўйича махсус элчиси Кит Келлог келганди. Бундан ташқари, Доналд Трамп 14 июл куни Москва 50 кун ичида урушни тўхтатиш бўйича келишувга эришмаса, Россиядан келадиган товарларга юз фоизлик божлар жорий қилиш билан таҳдид қилди.

Россия ва Украина бунгача Истанбулда музокараларнинг икки раундини ўтказганди — 16 май ва 2 июн кунлари. Томонлар ўт очишни тўхтатиш масаласида силжишга эришмаган, аммо асирлар ва ҳарбийларнинг жасадларини алмашишга келишиб олганди.