«Бемаъни уйдирма». Макрон рафиқасини эркак деб атаган аёлни судга берди

218 саҳифадан иборат даъво аризаси АҚШнинг Делавэр штати судига топширилди, деб ёзади AFP. Унда Оуэнс «бемаъни, туҳмат ва ғайритабиий уйдирмалар»ни тарқатиши айтилади.

Ижтимоий тармоқларда миллионлаб обуначиларга эга бўлган Оуэнс бир вақтлар Брижит Макрон жинсини ўзгартирганини бир неча бор таъкидлаган. Хусусан, у ўзининг YouTube каналида (4,5 миллион обуначига эга) «Брижитга айланиш» номли саккиз қисмдан иборат подкастни эълон қилди, унинг эпизодларидан бири «Франциянинг биринчи хоними эркакми?» деб аталади.

Ижтимоий тармоқларда кўп йиллардан бери айланиб юрган конспирологик назарияга кўра, Франциянинг биринчи хоними Жан-Мишел Троне (аслида акаси шундай исмда туғилган) исми билан дунёга келган. Бу назария ҳеч қандай тасдиққа эга эмас.

Франция президенти ва унинг рафиқаси адвокатлар орқали Оуэнсдан бу даъволардан воз кечишни бир неча бор сўраганини, бироқ «охир-оқибат вазиятни ўнглашнинг ягона йўли судга мурожаат қилиш деган хулосага келгани»ни айтишган.

Макроннинг таъкидлашича, Оуэнс ўз даъволари ёлғонлигининг барча далилларини эътиборсиз қолдирган ва туҳмат кампаниясини бошлаш ниятида.

Макронлар оиласи Оуэнсни яна икки пункт бўйича ёлғончиликда айбламоқда: даъвога кўра, ушбу аёл Эммануэл ва Брижит ўзаро қариндош эканини даъво қилган, шунингдек, Макрон «Марказий разведка бошқармаси амалга оширган онгни назорат қилиш дастури доирасида Франция президенти сифатида танлангани»ни айтган.

«Агар қачондир туҳматнинг аниқ ҳолати бўлган бўлса, бу ўша ҳолатдир», – деди эр-хотиннинг манфаатларини ҳимоя қилувчи адвокат Том Клэр.