111 гуманитар ташкилот Ғазога ёрдам етказилишини талаб қилмоқда

100 дан ортиқ халқаро гуманитар ташкилотлар Ғазо секторида яқинлашиб келаётган оммавий очарчиликдан огоҳлантирди ва инсонпарварлик ёрдамининг етиб боришини таъминлаш учун қўшма мурожаат эълон қилди. Мурожаат 111 ташкилот, жумладан, "Чегара билмас шифокорлар" (MSF), Save the Children ва Oxfam томонидан имзоланган. Хатни Германиянинг бир қанча ташкилотлари ҳам қўллаб-қувватлади: Welthungerhilfe, Caritas, Forum Ziviler Friedensdienst ва Weltfriedensdienst.

Имзоловчилар барча қуруқликдаги ўтиш жойларини очишни, озиқ-овқат, тоза сув, дори-дармон, бошпана ва ёнилғи етказиб беришнинг БМТ бошчилигидаги механизм орқали тўлиқ қайта тикланишини, блокадани тўхтатиш ва зудлик билан ўт очишни тўхтатишга келишиб олишни талаб қилмоқда.

Мактубда «жанг усули сифатида тинч аҳолини очликдан ўлдириш уруш жинояти» эканлиги таъкидланади. «Бирлашган Миллатлар Ташкилоти бошчилигидаги гуманитар тизим қулагани йўқ, унинг фаолиятига тўсиқ қўйилди. Гуманитар ташкилотлар кенг миқёсда жавоб бериш учун ресурсларга эга, аммо кириш тақиқлангани сабабли биз муҳтожларга ёрдам бера олмаяпмиз, жумладан, ўзимизнинг ходимларимиз ҳам чарчаган ва очликдан азоб чекаётган пайтда», — дейилади мактубда.

Исроил Ғазо секторини блокадага олиш ва очликдан уруш усули сифатида фойдаланиш айбловларини бир неча бор рад этиб келади. Мамлакат Мудофаа вазирлиги таркибига кирувчи COGAT Исроил ҳукумати ташкилоти инсонпарварлик ёрдамини етказиб бериш билан шуғулланади.