Француз вазири яқин кунларда араб давлатлари “илк бор ҲАМАСдан қуролсизланишни талаб қилишлари”ни айтди

БМТнинг 28-29 июль кунлари ўтказиладиган тадбирида араб давлатлари “илк бор ҲАМАСни қоралаб чиқишади ҳамда ундан қуролсизланишни талаб қилишади”. Бу ҳақда Рейтер агентлиги Франция ташқи ишлар вазири Жан-Ноэль Баррога таяниб хабар қилди.  

Франция дипломатияси раҳбарининг сўзларига кўра, бу қадам Европадаги кўпроқ мамлакатларни Фаластин давлатчилигини тан олишга ундашга қаратилган. Унинг айтишича, Нью-Йоркда бўлиб ўтадиган тадбирда Европанинг айрим мамлакатлари Фаластин давлатини тан олиш ниятларини тасдиқлашади. 

Вазирнинг қўшимча қилишича, Европа комиссияси яқин ҳафталарда Исроилга нисбатан “янада кескинроқ позицияни эгаллайди: Иудея-Самарияда ҳар қандай янги аҳоли масканлари қурилишини тўхтатиш ҳамда инсонпарварлик ёрдами тақсимланиши устидан ҳарбийлашган назоратни бас қилиш”ни талаб қилади.

Ҳозирча Елисей саройи Фаластинни тан олмади. Франция президенти Эммануэл Макроннинг билдиришича, бу бир ярим ойдан сўнг, БМТ Бош ассамблеясининг 80-сессиясида содир бўлади.  

Аввалроқ Рейтер агентлиги Макрон бир неча ҳафта давомида Канада ва Буюк Британия етакчиларини Фаластин давлатини биргаликда тан олиш ғояси билан чиқишга кўндиришга уринганини ёзганди. Қайд этилишича, Оттава ва Лондон АҚШ президенти Доналд Трампнинг кескин муносабат билдиришидан чўчиб, унинг бу ташаббусига рад жавобини берган.