Nokia смартфонлар бозорига қайтишини эълон қилди

Финландиянинг дунёга машҳур Nokia бренди шу йилнинг бошида смартфонлар ишлаб чиқаришни тўлиқ тўхтатганини маълум қилганди. 7 ойлик танаффусдан сўнг Nokia янги режалар билан бозорга қайтишини эълон қилди.

Фото: Nokia

Компания айни пайтда ўз бренди остида мобил техникаларни биргаликда лойиҳалаш ва ишлаб чиқаришга тайёр бўлган йирик ҳамкор қидирмоқда. Чунки бренд бу гал бозорда ўзи ёлғиз эмас, ҳамкор билан бўлишга қарор қилган.

Компания расмий саҳифасида келтирилишича, Nokia ўз бренди остида мобил техникаларни биргаликда ишлаб чиқиш ва сотишга тайёр бўлган йирик ишлаб чиқарувчини фаол равишда қидирмоқда.

Сўнгги йилларда Nokia бренди бозорда фақатгина HMD Global билан тузилган лицензия шартномаси орқали тақдим этилган бўлиб, бу компания смартфонлар ва тугмали телефонларни ишлаб чиқарган.

Бироқ ушбу шартноманинг амал қилиш муддати 2026 йилда тугайди ва Android Authority маълумотларига кўра, унинг узайтирилиши эҳтимолдан узоқ.

HMD аллақачон ўз бренди остидаги қурилмаларни бозорга олиб чиқмоқда, бу эса Nokia билан ҳамкорлик аста-секин якунланаётганини исботлайди.

Технология олами таҳлилчиларига кўра, Nokia бренди бугунги ёш қатлам учун жозибали эмас, танилиш осон бўлмайди. Чунки Nokia’нинг обрўйи ва ўрни аввалгидан фарқ қилади, танилиш имконияти бундан 10-15 йилгига қараганда анча қийин.

Фин компанияси смартфонлар бозорида яна мустаҳкам ўрин эгаллаш учун жиддий саъй-ҳаракат қилишига тўғри келади. Кучли ҳамкор ва замонавий қурилмасиз бу қайтиш шунчаки рамзий аҳамият касб этиши мумкин, холос.

Эслатиб ўтамиз, шу йилнинг январь ойида Nokia компанияси Apple ва Samsung каби технология гигантларига қарши рақобат олиб бора олмагани сабабли ўз бренди остида телефонларни чиқаришни якунлаганини эълон қилганди.

#смартфон #Nokia