Россиянинг Красноярск ўлкасида тўрт кундан бери мобил интернет ишламаяпти

Красноярск ўлкаси губернатори Михаил Котюков ушбу минтақада «мобил интернет фаолиятига вақтинчалик чекловлар» мавжудлигини тасдиқлади. «Бу Красноярск ўлкасининг айрим ҳудудларида оператив вазият ҳақидаги маълумотлар асосида хавфсизлик чораларини кучайтириш ва тармоқ таҳдидларининг олдини олиш зарурати билан боғлиқ», — деб ёзди Котюков ўзининг Telegram-каналида. Унинг сўзларига кўра, «ҳозирда шунга ўхшаш воқеалар Россиянинг бошқа ҳудудларида ҳам бўлиб ўтмоқда».

«Ушбу вазиятга тушуниш билан муносабатда бўлишингизни сўрайман. Аҳоли ва инфратузилмани ҳимоя қилиш бугунги кундаги энг муҳим масала», — дея қўшимча қилди губернатор. Ўз навбатида, вилоят ҳукумати маҳаллий «Проспект Мира» нашри сўровига жавобан минтақада мобил интернет қачон яна ишлашини «билмаслигини» маълум қилди.

Красноярск ўлкаси аҳолиси мобил интернет йўқлиги ҳақида 26 июл, шанба куни кечқурун хабар беришни бошлади. Эртаси куни "Мегафоне", МТС ва "Билайн" интернетдаги муаммолар «уларга боғлиқ бўлмаган сабабларга кўра» пайдо бўлганини билдирди.

Смартфонларда интернетнинг ишламаслиги озиқ-овқат етказиб бериш билан боғлиқ муаммоларга, жамоат транспорти ва дўконларда тезкор тўлов тизими (СПБ) ёрдамида харидлар учун тўловни амалга ошира олмасликка олиб келди. Носозлик такси нархларининг ошишига ҳам сабаб бўлди: интернетсиз тизимлар сафар нархини тўғри ҳисоблай олмайди ва дастур камроқ машиналарни кўрсатади.