Трамп: «Медведевга айтинглар, тилини тийиб юрсин»

Азизлар, шу кунларда Доналд Трамп медиамаконда фавқулодда фаол. Масалан, Путинга навбатдаги марта муддат берди, Эпштейн ишида унинг номи тобора баландроқ тилга олинмоқда, етмаганига Россиянинг собиқ президенти Дмитрий Медведев билан тортишишга ҳам улгурди.

Путиннинг соясида тўрт йил президент бўлиб ишлаган Медведев анчадан буён Трампнинг эътиборини ўзига қаратишга уриниб келаётганди ва ниҳоят мақсадига эришди. Трамп навбатдаги постида Медведевга унинг фамилиясини ёзиб мурожаат қилди. Қуйида шу ҳақда.

{Yii::t(}

Ўтказиб юбориш 6s

«Ана у омадсизга айтиб қўйинг»

Демак, аввал гап нимада экани ҳақида. Уруш бошланганидан буён асосан Telegram-каналида пост ёзиш билан шуғулланаётган Медведев Трамп Путинга ўн кун муддат берганидан кейин АҚШ президентининг ҳар бир ултиматуми урушга бошлашини айтди. «Россия Исроил ҳам, Эрон ҳам эмас» деб ёзди Медведев. Унинг айтишича, Трампнинг гаплари сабаб Россия ва АҚШ урушиб кетиши мумкин экан.

Трамп эса Медведевни аяб ўтирмади. Фарқ шундаки, олдинлари Трамп Медведевнинг исмини айтмасди, бу гал истисно қилди. «Россиянинг ана у собиқ омадсиз президенти, ўзини ҳамон президент деб ўйлайдиган Медведевга айтиб қўйинг, тилини тийиб юрсин. У жуда хавфли ҳудудга кириб қолди» деб ёзди Трамп.

Медведев эса Трамп унга жавоб берганидан хурсанд бўлиб кетган кўринади, АҚШга ядровий апокалипсис билан таҳдид қилди. Россия собиқ президети ядровий зарба бериш тизими ҳақида худди мамлакат телеканалларидаги пропагандачилар каби гапирди. Медведевнинг постларини кўпчилик кулги билан қабул қилди.

Бу нима дегани?

Аслида бу оддий бир тортишувдек туюлиши мумкин, ахир Трамп бутун бошли Америка президенти, Медведев эса ягона рутбаси собиқ президент бўлган, ўша тўрт йилни масрур эслайдиган, ошиб борса «Ростелеком» бошқарув кенгаши раиси. Лекин бу тортишув қачон содир бўлганига эътибор беринг – Трамп Путинга ултиматум қўйганидан кейин. Медведевнинг риторикасига қараганда Россия Украина билан келишмоқчи эмас. Катта эҳтимол 8 август куни ҳеч қандай келишув бўлмайди. Ахир Медведев хавфсизлик кенгашида Путиннинг ўринбосари, Путинга хуш келмайдиган гапларни ҳар ерда гапириб юрмайди.

Эсингизда бўлса, Трамп энди президентликка келган вақтда Россияда унга нисбатан салбий гаплар айтилмаётган, чунки Москва унинг сайловда ғалабасидан мамнун эди. Чиндан Трамп келиб Киев ҳарбий ёрдамдан узилди, АҚШ Украинага босим қилди. Лекин охирги вақтларда Россияда Трампга нисбатан позиция ўзгарди. Айтганча, Медведев Трампни «қари амаки» деб атаганига қараганда Россияда энди Трампни ҳам худди Байден каби сўкишга рухсат берилган...

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов.

#Дмитрий Медведев #Доналд Трамп