Уиткофф ва Путин музокараларида «сезиларли ютуқларга эришилди» - Трамп

АҚШ президенти Доналд Трамп ўз махсус вакили Стивен Уиткоффнинг Россия президенти Владимир Путин билан учрашувини «жуда самарали» деб атади. Бу ҳақда у Truth Social ижтимоий тармоғида ёзди.

Унинг сўзларига кўра, учрашувда «сезиларли ютуқларга эришилди». У нимада ифодаланаётганига АҚШ президенти аниқлик киритмади.

«Шундан сўнг, баъзи европалик иттифоқчиларимизни хабардор қилдим. Ҳамма бу урушни тугатиш керак деган фикрга қўшилади ва биз яқин кунлар ва ҳафталарда бунинг устида ишлаймиз. Бу масалага эътиборингиз учун ташаккур!», деб ёзди Доналд Трамп.

Ушбу пост эълон қилинишидан бироз олдин Трамп Украина президенти Володимир Зеленский билан телефон орқали суҳбатлашди. Унинг тафсилотлари ҳозирча маълум қилинмаган.

Оқ уйнинг исми ошкор этилмаган вакили The New York Times нашри билан суҳбатда Путин ва Уиткофф учрашуви яхши ўтганини айтди. Унинг сўзларига кўра, Россия АҚШ билан музокараларни давом эттиришга интилмоқда. Аммо, шунга қарамай, аввалроқ АҚШ президенти айтган иккиламчи санкциялар 8 август куни жорий этилиши кутилмоқда.

АҚШ президентининг махсус вакили Стивен Уиткофф 6 август куни Москвада Россия президенти Владимир Путин билан учрашди. Бу тахминан уч соат давом этди. Унинг якунида Россия президенти ва Доналд Трампнинг махсус вакили ҳеч қандай баёнот бермади.

Россия президенти ёрдамчиси Юрий Ушаков учрашув иштирокчилари «баъзи сигналлар» билан алмашганини айтиб, ҳозирча батафсил изоҳ беришдан тийилишини қўшимча қилди.

Уиткоффнинг ташрифи АҚШ президенти Доналд Трампнинг Россияга қўйган ултиматуми муддати тугаши арафасида амалга оширилди. Трамп Путиндан 8 августга қадар ҳарбий ҳаракатларни бутунлай тўхтатишни талаб қилган. Акс ҳолда, АҚШ президенти иккиламчи санкциялар жорий этиш билан таҳдид қилди: Россиядан нефт сотиб олувчи мамлакатлар қўшимча божга дуч келиши мумкин.