Трамп расман тинчлик бўйича Нобел мукофотига номзод бўлди

Камбоджа бош вазири Хун Манет Нобел тинчлик қўмитасига мактуб йўллаб, унда АҚШ президенти Доналд Трампнинг хизматларини тинчлик мукофоти билан тақдирлашни таклиф қилди, деб хабар берди Камбоджа матбуот агентлиги.

«Мен Камбоджа Қироллиги бош вазири сифатида Америка Қўшма Штатларининг 45- ва 47-президенти ҳурматли Доналд Трампни дунёда тинчликни илгари суришга қўшган тарихий ҳиссасини эътироф этган ҳолда, тинчлик бўйича Нобел мукофотига расман номзод қилиб кўрсатиш шарафига муяссарман», деб ёзди бош вазир 7 августдаги мактубида.

Хун Манет Трампни «фавқулодда сиёсий донолиги» учун мақтади ва унга Камбоджанинг Таиланд билан можаросини ҳал этишда воситачилик қилгани учун миннатдорчилик билдирди. Мактубда, шунингдек, АҚШ президенти «дунёнинг баъзи энг беқарор минтақаларида кескинликни камайтириш бўйича фавқулодда ютуқларга эришгани» айтилган.

Таиланд ва Камбоджа ўртасидаги кескин муносабатлар 2025 йил 24 июлда чегарадаги бир қатор қуролли тўқнашувларга айланиб кетди. Икки томон ҳам ўнлаб қурбонлар ва минглаб эвакуация қилинганлар ҳақида хабар берди.

Кейинроқ Таиланд ва Камбоджа делегациялари Малайзия пойтахти Куала-Лумпурда учрашиб, 29 июл ярим тундан бошлаб ўт очишни тўхтатишга келишиб олди.

Сулҳ арафасида Трамп бир кун ичида Камбоджа ва Таиланд ўртасидаги қуролли қарама-қаршиликда «миллионлаб одамлар» ҳалок бўлишининг олдини олганини очиқ эълон қилди. АҚШ президенти сўзларига кўра, агар можаро тўхтатилмаса, савдо шартномалари тузилмаслиги ҳақида огоҳлантиришдан сўнг, иккала давлат ҳам тинчликка эришган.